Faailoa mai e Amata Porokalama mai le Tulafono CARES e Puipui ai Totogi ma le EIDL mo Amerika Samoa
Laumua i Uosigitone – Aso Gafua, Na saunoa le Tamaitaikonekeresi ia Aumua Amata o loo faaauau le auiluma o le Porokalama e Puipui ai Totogi a le Pulega o Pisinisi Laiti e pei ona faailoa mai i ni faamaumauga fou o le vaiaso. Ua 87 nei nonogatupe ua maua ma le manuia e pisinisi a Amerika Samoa i le Porokalama e Puipui ai Totogi e tusa ma le $5 miliona le aofaiga, ma o loo tatala pea le porokalama, maua tupe e faatupe ai ma talia talosaga i le taimi nei.
O le Tamaitaikonekeresi ia Amata ma le Taitaifono o le Komiti o Pisinisi Laiti a le Senate le susuga ia Marco Rubio (file photo)
O loo faailoa mai foi e Amata i soo se pisini laititi tau faatoaga i totonu o Amerika Samoa o loo avanoa Nonōgatupe mo le Afaina o le Tamaoaiga i Mala (faapuupuina i le faaperetania o le EIDL) e mafai ona talosagaina e ala atu i le SBA e filifili ai pisinisi e taula'i i faatoaga. (E tatau i lea pisinisi ona pei o pisinisi e i totonu o vaega o lafoga.)
O lea porokalama fesoasoani o le EIDL e ese mai le Porokalama e Puipui ai Totogi, e ui o porokama uma a le SBA na faatupeina e le Konekeresi, muamua i le Tulafono iloga o le CARES, ona toe tului lea i se faaopoopoga e $60 piliona o fesoasoani mo le EIDL i totonu o le Tulafono faifaatasi a itufaaupufai e $484 piliona mo le Porokalama e Puipui ai Totogi ma Faalelei ai Tausiga Faasoifuamaloloina.
Ua na o pisinisi tau faatoaga o loo tatala atu ai i le taimi nei le EIDL, ma e mafai ona aofia ai nonōgatupe ma i nisi o mataupu, o seleni e mua'i maua i taimi o faalavelave faafuasei e mafai ona faamagalo. Fesili i lau fale nonōtupe e iloa ai pe agavaa lau pisinisi faatoaga mo lea fesoasoani.
Saunoa Aumua Amata "E matuā tāua i le taimi nei le mautu lelei o a tatou mea taumafa. E mafai e lea porokalama ona fesoasoani i pisinisi laiti tau faatoaga ia ola pea a o feagai ma fitā o le tamaoaiga, ma o se vaega o le taumafaiga a le malo aoao e faaauau gaoioiga o le faasologa o meataumafa.
A fai e agavaa, o se seleni e mua'i tuuina atu i taimi o faalavelave faafuasei mai le EIDL e mafai ona o'o atu i le $10,000, e fua i le aofai o tagata faigaluega. I tulaga faapea, o lea seleni na mua'i tuuina atu e le toe tau totogia.
O soo se pisinisi tau faatoaga e agavaa ma faalapotopotoga e le maua ni tupe mamā o loo totōina ma gaosia meataumafa e mafai ona maua faamatalaga i nei here.
Faaauau le saunoaga a Amata "Na pasia e le Konekeresi le Porokalama e Puipui ai Totogi ma le EIDL e fesoasoani e faasao a tatou tagata faigaluega ma pisinisi laiti i taimi o fitā o le tamaoaiga ua pogai i le ma'i pesi. E tāua lau pisinisi, ia taga'i ane faamolemole pe mata e tonu mo oe le Porokalama e Puipui ai Totogi poo le EIDL. O loo faaauau le faagasolo e le SBA o fesoasoani e maulalo le tupe totogi faasili ma tuutuuga mo tupe toetotogi e aoga ina ia gaoioi ai pea pisinisi.
###