Faamalo Amata i alo aoga e toalua ua talia i Aoga iloga a le Malō
Uosigitone, D.C. – Aso Faraile Fiafia lava le afioga i le tamaitaifaipule ia Aumua Amata e faamalo atu i alo aoga e toalua mai Amerika Samoa ua talia i Aoga iloga a le malo i totonu o le atunuu. Na faailoa atu i le tamaitai faipule ia Amata o Ben So'otui Schuster ua tofia e le Aoga a le Air Force a le Iunaite Setete i Colorado, ma ua talia foi Aitulagi Alofa e le Aoga a le Navy a le Iunaite Setete i Annapolis Maryland.
"E faamalo atu ia Ben Schuster ma Aitulagi Alofa i nei tulaga maoa'e ua la ausia!" saunoaga lea a Aumua Amata. "Ou te matuā fiafia lava e faailoa atu nei tofiga e lua i nisi o a tatou aoga e lua e aupito sili ona iloga a le militeri. Ou te iloa o le nei tala fiafia e mitamita ai o oulua aiga, aoga, faiaoga ma afioaga. E mitamita uma matou i Amerika Samoa i lo oulua galue filigā ma le tauaveina o le igoa o nai o tatou motu."
Faamalo atu ia Alofa Aitulagi ma ona matua!
O Aitulagi Alofa e vasega sefulu lua i le Aoga a Manumalo. O ia o se alo tamaitai e faasino i le afioga Papali'i Lauli'i Alofa ma Leota Wanda Papali'i mai afioaga o Malaeimi ma Pago Pago i Amerika Samoa. E ofoina atu lona taimi mo porokalama e faia pe a mae'a aoga, e aofia ai le fesoasoani i nisi o fanau aoga i mataupu uma i totonu o lana aoga. O ia o le peresetene a le Aoga a Manumalo i le Sosaiete a i latou ua ausia togi maualuga. Sa ia faatulagaina le tele o sailiga tupe i Amerika Samoa e au mai ai foma'i faapito o le fatu (cardiologists) e taumafai ai e foia le fiva rumatika, o se faafitauli ogaoga i Amerika Samoa.
Faamalo atu ia Ben Schuster faapea ona matua!
O Ben So'otui Schuster o se alo o Tomasi ma Daisy Schuster o le afioaga o Tafuna. E vasega sufulu lua o ia i le Aoga a Manumalo. E ofoina atu e Ben lona taimi pe a tuua aoga e fesoasoani ai i vasega feololo a le aoga faapea le kalapu mo tama ma teine (Boys and Girls Club). Ae le gata i lea, e faaavanoa le taimi e Ben e ave ai vasega i le Kolisi Tuufaatasi a Amerika Samoa. Ua manatu Ben e talia ma lona loto atoa lona tofia e aoga i le Aoga a le Air Force ma o loo fuafua o ia i le aga atu i Colorado.
Ona o nei tautua ma agavaa, e faaopoopo i le ausia o togi maualuga i aoga ua mafua ai ona talo atu Amata i le nei tausaga mo nei alo aoga e tauva mo nei tofiga.
"O avanoa aogā nei mo le olaga, ma o nei tofiga e maua e ala i le tinoū i le aoga maualuga," saunoaga lea a le Tamaitaifaipule ia Amata. "Faaauau galuega lelei, ma e ofo alofa atu matou uma mo alo uma o aooga i aoga eseese faapea alii ma tamaitai o tautua i le malō.