Tusi atu Amata i le Taupulega e faamamafa ai le tāua o le faitau o Tagatanuu uma o le Iunaite Setete i le Tauaofaiga o tagata

Uosigitone, D.C. Aso Lulu–Na tusi atu le Tamaitaikonekeresi ia Aumua Amata i le Loia Sili a le Iunaite Setete le susuga ia William Barr ma le Failautusi o Fefaatauaiga ia Wilbur Ross e faailoa ai le tāua o le faitauina atoa o Tagatanuu o le Iunaite Setete i totonu o le Tauaofaiga o tagata a le Iunaite Setete.

"O loo taga'i le Matagaluega o Faamasinogatonu a le Iunaite Setete i ni tulaga e uiga i le Tauaofaiga o tagata e tusa ai o ni faaiuga lata mai ma faamuamua faaletaupulega a le Faamasinoga Sili. Na ou manatu e faailoa so'u taofi ma faamamafa le tulaga faapitoa o Tagatanuu o le Iunaite Setete, le mitamitaga o o tatou tagata i le avea ai ma tagata Amerika, ma tulaga e ono aafia ai le faitau o Tagatanuu o le Iunaite Setete e le gata i Amerika Samoa faapea le atunuu atoa ona o le Tauaofaiga o tagata.

O le tusi atoa lea a Amata:

Lau susuga i le Loia sili Barr:

E ao i Sitiseni o le Iunaite Setete ma ona Tagatanuu le matafaioi o le lotonuu ma gaua'i atu i le Iunaite Setete ma latou tauave tusifolau Iunaite Setete faatasi ma o latou faasinomaga. O lea la, ou te atugalu ona e leai se aiaiga ua faia mo Tagatanuu o loo nonofo i totonu o le Iunaite Setete i fafo o Amerika Samoa ina ia faitauina i le Tauaofaiga o le 2020. Ua faailoa manino mai e le Taupulega tulaga faatāua e uiga i fesili tau sitiseni i totonu o le Tauaofaiga o le 2020. I totonu o nei tulaga faatāua, ma e tusa ai o ni faaiuga talu ai nei a le Faamasinoga Sili ma Faamasinoga faafeterale, ou te fia faailoa mo lo outou silafia le tulaga tonu e uiga i le tāua o le faitauina atoa o Tagatanuu uma o le Iunaite Setete mai Amerika Samoa. E aofia ai e le gata o i latou o loo alala i totonu o le Teritori ae faapea foi le toatele o loo alala i soo se vaega o le Iunaite Setete.

Ou te talisapaia le faamoemoe o le Taupulega i le mulimulita'i i le Faavae ma le aoina o se faitau e atoa ma tonu. Ona o le lagolagoina o lea faamoemoe, e popole lo'u tagata o le a le atoa le taliga o se fesili tau sitiseni pe a le faamanino le faatonuga i Tagatanuu o le Iunaite Setete i tulaga pe faapefea lo latou faitauina. O le faamautinoa e mafai e Tagatanuu o le Iunaite Setete faapei o o latou uso Amerika ona faamaonia lo latou faasinomaga ma ia taulia, ou te taofi ai o se tasi lea o faamaoniga tatau ma le tāua e ao ai ona faaopoopo se fesili e aofia ai uma Sitiseni o le Iunaite Setete poo Tagatanuu i totonu o le pepa faatumu o le tauaofaiga.

Ua selau sefuluiva tausaga o avea tagata Amerika Samoa ma tagata Amerika. E ui e tu lata i le 60,000 le faitauaofai o tagata Amerika Samoa, e sili atu ona tele Tagatanuu o le Iunaite Setete mai Amerika Samoa o loo nonofo i setete e 50 na i lo totonu o Amerika Samoa. O le mautinoa o le faitaulia o tagata Amerika Samoa na fananau i totonu o le teritori ma nonofo i soo se vaega i totonu o le Iunaite Setete e tāua lea ina ia maua atoa ai fuainumera i soo se itumalo ma leai ai se faaituau e le i fuafuaina. O a'ai e toatele le faitauaofai o Tagatanuu o le Iunaite Setete e aofia ai Utah, Nevada, Hawaii, Kalefonia ma Uosigitone e ono le maua e i latou fesoasoani tāua mai le feterale pe le mafai e i latou ona aofia Tagatanuu i totonu o a latou tusi talosaga.

E ui ou te iloa ua faia aiaiga ina ia faitau lelei ai i latou i totonu o le teritori, ou te popole i Tagatanuu o le Iunaite Setete i nisi vaega o le atunuu o le a le faitauina lelei, pe ua le mautonu foi i latou i se fesili tau sitiseni e na o le lua tali pe lua foi filifiliga- sitiseni poo se tagata mai fafo e aunoa ma faatonuga manino. Talu ai e le o faamatala manino e nei filifiliga ia i latou, e ono ela nisi e faatumu atoa le pepa faatumu, pe faafoi atu se pepa faatumu le tonu e le pogai ona o latou.

Ou te talosaga se taga'i faasinotonu i se ala sili e faitauina ai ma aofia atoa Tagatanuu a le Iunaite Setete i totonu o le Tauaofaiga a le Iunaite Setete e foia ai popolega i se faitau le atoa ae maise lava nofoaga e tele ai le faitau o tagata Amerika Samoa. O loo faapipii atu se tusi o loo iloilo auiliili ai le tulaga o Tagatanuu o le Iunaite Setete i totonu o la tatou faigamalo.

E faai'u la'u tala i lo'u fia faailoa atu le moni o le mitamita o tagata Amerika Samoa i le avea ai ma tagata Amerika. O Aperila 17 le aso o le matou Fu'a, e faamanatu ai le ulua'i sisi o le tagavai a le Iunaite Setete i le 1990, ma o le aso malolo faalelalolagi aupito tāua lea ia matou. O Amerika Samoa e aupito tele ai le faitau o ē ulufale atu i Vaegaau a le Malo pe a fua i le faitau o tagata taitoatasi. O le faitau foi o a tatou Fitafita tuai taitoatasi e maualuga ae se pagā lea e maualuga foi le faitau o e maliliu e tusa o tala faamau. E talo atu ai ina ia faamolemole tau ane i sau faitau le tautua ma le soifua ofoina atu o i latou e ala i le faitauina o a latou uso Tagatanuu Iunaite Setete o loo i Amerika Samoa ma le Iunaite Setete atoa.

Ou te fai ma sui o nai o matou tagata, e momoli le faafetai i lo outou utagia mai.

I le agaga moni,

Aumua Amata Coleman Radewagen

Sui o le Konekeresi

O se kopi o le nei tusi ua auina atu i le Afioga Wilbur Ross, Failautusi o Fefaatauaiga