Aofia i le Faaloaloaga o le Faatupeina o le Malō se masina faaopoopo i le 100% o le Tupefaafetaui mo le Medicaid

November 20, 2019
Fa'asalalauga Aloa'ia

Laumua i Uosigitone – Aso Lulu, Na saunoa le Tamaitaikonekeresi ia Aumua Amata na pasia e le Maota le faaloaloaga o aso mo tupe faaalu faatulaga a le malo feterale e aofia ai le masina faasili mo le 100 pasene o le tupe faafetaui mai le feterale i le Medicaid mo Amerika Samoa, lea ua toe faaopoopo le isi 30 aso e o’o atu ia Tesema 20, 2019.

O le faalua ai lea ona faaopoopo aso mo le fesoasoani i le Medicaid ma o le pasiga muamua i le amataga o le tausaga lea na faaopoopo ai e tusa o vaiaso e valu mai ia Setema 30 e o’o ia Novema 21.  O loo faaauau pea i le taimi nei galuega i le Konekeresi e faatulaga ai se aiaiga mo le Medicaid mo se taimi umi ma o le a faaitiitia ai le tau e totogi e Amerika Samoa nai lo le 55-45 pasene mo isi tausaga a sau, faatasi ai ma le sii i le tapulaa i tupe faaalu i le taimi nei.

O le tau faapitoa i le taimi nei o le fesoasoani e 100 pasene ua tatala ai le faitau fia miliona talā o tupe i le tausaga nei se manū e faaaoga uma e totogi ai le 45 pasene faatulagaina o tupe faafetaui e totogi e le Teritori mo le Medicaid.

Saunoa Aumua Amata, “Na pasia e le Maota le faatupega o le malō mo se taimi puupuu o loo faaopoopo ai se isi masina i le tau e 100 pasene le Medicaid mo Amerika Samoa.  O lea fesoasoani faapitoa mo le Medicaid na ulua’i pasia ona o le afā o Kita, ma ua aogā mo lo tatou Teritori.  O le a faaauau pea lo’u galue mo faaleleiga i aiaiga tau Medicaid e mafai ona sili atu i le 45 pasene o le tupefaafetaui lea e tatau i le Teritori ona totogi.

 

Congresswoman Amata with Administrator Seema Verma of the Centers for Medicare & Medicaid Services (CMS)
Le Tamaitaikonekeresi ia Amata ma le Pule o Ofisatutotonu a le Medicare & Medicaid ia  Seema Verma

 

O loo faagasolo pea i totonu o le Konekeresi taumafaiga e faamautu ai fesoasoani tau Medicaid mo se taimi umi.  Na auai le Tamaitaikonekeresi ia Amata i le atina’ega e itufaaupufai e lua o le taumafaiga a le Maota, ma o ia o se ulua’i suilagolago mai le vaega faavae, o le Tulafono mo le Faaleleia o Tausiga Faasoifuamaloloina mo Teritori, H.R. 3631.  O lea pili na avea ma vaega o se pili autū lea foi na avea ai o ia ma suilagolago: H.R. 2328, O le Pili mo le Faatupeina, Faafouina ma le Faaleleia o le Soifuamaloloina o le Atunuu.  O se faaiuga a le Konekeresi i se tulafono o le a pogai mai se maliliega i le va o le Maota ma le Senate.

Na faaauau le saunoaga a le Tamaitaikonekeresi, “O loo ou uunaia le Konekeresi ina ia faamae’a se aiaiga mo Teritori e faamautu ai tausiga ma tupe maua mo le soifuamaloloina o Amerika Samoa, ma saunia ai se tau mautū ma sili atu ona lelei mo tupefaafetaui mo ni nai tausaga.  E lagona lo’u faamalieina ona o le matau atu o ta’ita’i o le Maota ma le Senate o loo o latou loto atu e faataunuu i le tini lea taumafaiga tāua.”

###

 

Issues: