Avea Amata ma sui lagolago i Pili tau Fagotaga o loo Iloilo e le Komiti

May 8, 2019
Fa'asalalauga Aloa'ia

Uosigitone, DC – Aso Lulu, O le Tamaitaifaipule ia Aumua Amata o se tasi lea o uluai sui lagolago i pili e lua mo fagotaga na iloiloina i se fonotaga a le Komiti mo Alamanuia Faalenatura faapea se pili a le Pasefika na autasia ai itu faaupufai e uiga i aiaiga faaleaoaoga.  O le iloiloga a le Komiti laititi o le Suavai, Sami ma le Vaomatua o se laasaga tāua e faagasolo ai nei pili mo se palota.

O le Tamaitaifaipule ia Amata o se tasi o sui lagolago (se tasi o sui Ripapilikana e toalua ma sui Temokalasi toalua) i le pili ua autasi ai itu faaupufai e Atina’e ai Aliifagota Laiti, H.R. 1240, e faamautū ai le lumanai o fagotaga i Amerika Samoa ma uunai le atinaega o le isi augatupulaga o au faifaiva faapisinisi i tupe fesoasoani mai le feterale.

O le uluai taimi lenei ua maua ai porokalama faatupeina mo le atunuu e ala mai le Matagaluega o Fefaatauaiga o le a faaleleia ai le a’otauina, aoaoga ma le atinaega i galuega mo le isi augatupulaga o tagata faifaiva faapisinisi.

Saunoa Aumua Amata, “O fagotaga o le ivitu lea o la matou tamaoaiga i Amerika Samoa.  O le a fesoasoani le nei porokalama ia uluulumatafolau ma lavataoso ai le au faifaiva laiti auā le tai o le seneturi 21.  O le nei taumafaiga e maua ai alamanuia ma faatāua ai aoaoga mo galuega e lelei totogi.”

Ae le gata i lea, na avea foi le tamaitaifaipule ma sui lagolago o le pili HR 1218 o le Komiti Fautua i Fagotaga a Amerika, o le a faaopoopo ai tupe maua mo suesuega ma le atinaega o fagotaga.  O le a faamanino foi e lea pili i le Komiti Fautua i Fagotaga a Amerika le tatau ona leo tutusa uma vaega auai e tele ai ma le sao o le Pasefika.

Sa avea foi le Tamaitaifaipule ma sui lagolago o se pili na autasi ai itufaaupufai, HR 2405, National Sea Grant College Program Amendments Act of 2019, lea na faaulu e le Taitaifono o le Komiti Laititi o le Suavai, Sami ma le Vaomatua le susuga ia Jared Huffman o se Sui Temokalasi mai Kalefonia.  O le nei taumafaiga e faalauiloa ai suesuega, vasega ma porokalama faaleaoaoga e uiga i mataupu tau gataifale ma le sami.

O le pili e atinae ai le aufaifaiva laiti na faaulu ia Fepuari e le Ta’iulu o le Maota, le Faipule ia Don Young o se Sui Ripapilikana mai Alaska ma le Faipule ia Jared Golden o se Sui Temokalasi mai Maine, le Faipule ia Aumua Amata o Amerika Samoa ma le Faipule ia Seth Moulton o se Sui Temokalasi mai Massachusetts.

O le a faataga ai le o’o atu i le $200,000 o tupe maua e ala atu i le Porokalama Sea Grant a le NOAA e fesoasoani ai i aoga fou faapea aoga ua mautū e a’oa’o, faalauiloa ma fesoasoani ai i le aufaifaiva laiti.  O nei porokalama, faasoa ma tautua e aofia ai le faatautai ma le saogalemu; tausiga o va’a; o faiga faiva faaonaponei e faaaoga ai le tekonolosi; faiga faapisinisi e lelei; vaaiga o tupe ma foia faafitauli e feagai ai.

###

 

Issues: