Avea Amata ma Suilagolago i se Toeteuteuga o le Faavae e puipui ai le Tagavai a le Iunaite Setete

September 9, 2019
Fa'asalalauga Aloa'ia

Laumua i Uosigitone – Aso Gafua, Na faalauiloa mai e le Tamaitaikonekeresi ia Aumua Amata lona avea ma suilagolago i se taumafaiga e puipui ai le Tagavai a le Iunaite Setete e ala i se Toeteuteuga i le Faavae.

Saunoa Aumua Amata, “ I totonu o Amerika Samoa, e maualuga le faitau o o matou tagata e tautua i le militeri, ma e i ai uma a matou uo ma aiga o loo tautua mo le malō i nisi atunuu.  E toatele foi le faitauaofai o a matou Vetereni.  Na tautua lo’u tamā i totonu o le Pasefika i le Taua lona Lua a le Lalolagi, e aofia ai lona faasaoina mai osofaiga i Oahu ma Pearl Harbor, a o loo i ai o’u tuagane o loo tautua i le vaitau o le taua i Vietnam.  E toatele aiga i Amerika Samoa na tautua i vaegaau a le malō, ma e i ai le tatou mitamitaga faapitoa i nei totino o aiga.”

 

Governor Tali Peter T. Coleman on an inspection tour of Tutuila in 1957
Le afioga i le Kovana ia Tali Pita T. Kolumane ma le fu’a a le Iunaite Setete e 48 fetu i se malaga suesue i Tutuila i le 1957.

 

O loo lagolagoina e le Tamaitaikonekeresi ia Amata le pili H.J. Res. 65, o se iugafono faifaatasi o loo talosagaina ai se toeteuteuga i le Faavae e toe faafoi ai i le Konekeresi le pule e puipui ai le tagavai mai faiga e lepeti ai le tino o le fu’a.

Saunoa le Tamaitaikonekeresi ia Amata,“I tua atu o le 1989, na silafia faalauaitele ma lagolagoina le faaaloalo i le tagavai, ma sa puipuia i le tulafono le tagavai i setete e 48.  Na aveese e faaiuga a le Faamasinoga lea puipuiga, e pau lava le ala e toe faafoi ai le tulaga puipuia o le tagavai o se toeteuteuga i le faavae.”

O lea Iugafono na faauluina i le Konekeresi e le Aliikonekeresi ia Steve Womack (Ripapilikana-AR) ma nisi o ulua’i suilagolago ia Iuni 14, o le faamanatuga o le Aso o le Fu’a a le Malō i le taliaina o le tagavai a le Iunaite Setete e le Konekeresi Tutotonu ia Iuni 14, 1777.

###

 

Issues: