E tala'i e le faa-Samoa le faaeaina ma le mamalu

June 11, 2019
Fa'asalalauga Aloa'ia

Talofa,

I Amerika Samoa, matou te faatāua a matou tu poo aga.  Matou te le liuagofie pe seetiagofie  i le malū o le tai taeao; o se tasi lea o itu matou te malosi ai! E tusa lava pe sui le lalolagi, ma tupu le tekonolosi, matou te faatāua tu masani ma la matou aganuu mai anamua; matou te faaaloalo i o matou tagata matutua. E lelei o matou ala. E le tatau fo'i ona faauiga sese ma faaaoga sese pe faaoleole e ufiufi ai se mea leaga. O sauaga i totonu o aiga e le tusa ai lea ma le faa-Samoa.  E tala'i e le faa-Samoa le faaeaina ma le mamalu, ae le o le maasiasi.

I ni tausaga, i totonu o le Iunaite Setete, faapea le laloloagi e oo lava i aso nei,  ma i nei, na i ai lava sauaga i totonu o aiga ae le tau ai le vaai i nisi o taimi. E mafai ona natia lata mai ia tatou, pe o nisi o taimi, pagā lea ua tuuaia le ua afaina.  Faafetai o lea ua i ai suiga, ma e lelei suiga. O aso nei ua molia i le tulafono tagata. O loo faailoa i ala leo faasalalau faiga sāua.  Fai le amiotonu, o le sauaga i totonu o aiga o le solitulafono, ma o lo tatou tiute le vaoia lea.

O loo matua taga'i toto'a le tulafono ma faamasinoga i sauaga i totonu o aiga i ona po nei. Ae o oe le puipuiga sili, i tatou uma lava...Ua e silafia lou aiga, lou afioaga. E masani foi ona e iloa e i ai se mea e le o tonu. Ia naunau e vaai mo se tasi e ono afaina ona o sauaga.  Talanoa ia te i latou.  Talanoa i se tasi e mafai ona maua ai se fesoasoani. O se matai, faifeau, poo se tagata o lona tiute le faamalosia o tulafono. E i ai le matafaioi faapitoa ua tuu e le Atua i nei ta'ita'i e puipui ma fesoasoani ia te i latou e manaomia.

Afai o e afaina i sauaga, matou te manana’o e saogalemu oe ma o loo i ai le fesoasoani, e o’o lava i porokalama a le malo poo le lotu ma faalapotopotoga e mafai ona faamautinoa e i ai sou toomaga e te sulu i ai, maua meataumafa poo tausiga faasoifuamaloloina. Aua le avea lagona o le maasiasi ma le fefe e taofia ai oe, ma ia aua foi ne’i faapea atu se o loo sauā o oe le pogai.  E leai lava se tasi, se aiga poo se isi o loo pule, e i ai le aiā e fasi ai oe pe faatiga ia oe.  Talanoa i se tasi e te talitonuina, ma sui lou lumanai.

Afai e te manatu o e afaina i sauaga i totonu o aiga, saili loa se fesoasoani.  Talanoa i se tasi e te faatuatuaina.  Aua e te natia ona e o’o ai i se tulaga e sili atu ona leaga talu ai a le taofia le o loo sauā o le a ia faaauau pea. E tatau ona taofia o ia e i latou ua a’otauina i le nei matatā.  

###

 

 

Issues: