Faatāua e Amata le Avanoa mo Vetereni e Talanoa ai i Sui o le Konekeresi

October 4, 2019
Fa'asalalauga Aloa'ia

Laumua i Uosigitone—Aso Faraile, O loo faatāua e le Tamaitaikonekeresi ia Aumua Amata se avanoa mo Vetereni o Amerika Samoa e talanoa ai i le Taitaifono o le Komiti o Mataupu mo Vetereni faapea Sui o le Konekeresi.

Saunoa Aumua Amata, “I le ava e tatau ai ou te talo atu ai ia tatou Vetereni e tala mai aao ma auai i lea avanoa e seaseā maua, e pei ona toatele Vetereni auai ma sagisagi mai lea malaga.  O se avanoa lelei lea e te saunoa tonu ai i ta’ita’i o le Komiti mo Vetereni,  ma a taliu atu i latou ua lelei lo latou silafia o tulaga o lou soifuaga faavetereni.

O le Tamaitaikonekeresi ia Amata o se tasi o le au malaga aufaatasi a itufaaupufai o Sui Tofia o le Konekeresi o loo taitai e le Taitaifono ia Mark Takano. Ua mae’a ona feiloa’i le au malaga a Suitofia o le Konekeresi ma Vetereni mai Kuameni ma ua fuafua mo isi feiloaiga faapea ma le CNMI ma Filipino a o le i tau mai i Amerika Samoa.  Ua i ai se fuafuaga a tau mai i Amerika Samoa, ua faatulaga e le Teritori se Feiloaiga e Faafofoga ai i Vetereni i le Aso Lulu, Oketopa 9 mai le 9:30 aga’i i le 11 i le taeao i le Maota tutotonu o Vetereni i Tafuna.

 

Veterans CODEL in Guam
Ata o le Komiti mo Mataupu tau Vetereni: Taitaifono ia Takano ma Sui o loo talanoa ma Vetereni i Kuameni i se taimi ua mavae.

 

Saunoa Amata, “E ao ona silafia e a tatou Vetereni taumafaiga faasili a le Taitaifono ia Takano e  tatala ai le avanoa mai le Fofogafetalai ina ia aofia Amerika Samoa talu ai o le malaga mai i le Pasefika ua umi atu ai le malaga na i lo le tapulaa faatulaga a le Maota.  O le ulua’i asiasi mai foi lea a le Taitaifono a le Komiti mo Vetereni i nai o tatou atu motu.

O loo malaga faatasi mai le Taitaifono ma le Tamaitaikonekeresi ia Amata, faapea le Tamaitaikonekeresi ia Julia Brownley, le Aliikonekeresi ia Gregorio Kilili Camacho Sablan, ma le Aliikonekeresi ia Michael F.Q. San Nicholas.

Faaauau le saunoaga a le Tamaitaikonekeresi ia Amata, “Na fiafia tele i matou i talanoaga na faia ma Vetereni i Kuameni, ma ou te iloa e tāua lea mo galuega a le Komiti i mataupu i Vetereni. E tatau ona iloa e la matou Komiti itu e sili ona tāua ia te oe ma le tulaga o loo i ai le aoga o tautua mo oe, ia tala mai aao ma faailoa mai ia matou.”

###

 

Issues: