Faataua e Amata le Aofia ai o Amerika Samoa i le Pili Fesoasoani

February 28, 2021
Fa'asalalauga Aloa'ia

Laumua i Uosigitone – Aso Sa, O loo faataua e le Tamaitaikonekeresi ia Uifaatali Amata le manuia o le aofia ai o Amerika Samoa i totonu o le pili ua pasia e le Maota mo fesoasoani tau COVID-19 ma taufaatupu ai le tamaoaiga. O lea pili o le a auina atu ai miliona o seleni fesoasoani a le feterale i Amerika Samoa mo taumafaiga i tui puipuia, $1,400 a le tagata e taufaatupu ai le tamaoaiga, alamanuia mo le Malo o Amerika Samoa, aoga, fesoasoani mo meataumafa, ma nisi mea e tele. 

Saunoa le Tamaitaikonekeresi ia Amata “O le gaoioiga muamua o le galue ia tutusa le faiga faapei ona faia i setete, ma o totonu o le pili o loo aofia ai atoa le Teritori i alamanuia fou.  Ou te mautinoa ua lata le oo atu o lea fesoasoani mai le feterale.  O lea pili e $1.9 tiliona (trillion) e tusa o le tasi vae tolu o le tupe faaagaaga atoa a le feterale, e mafai la ona i ai teuteuga poo fetuunaiga a le Senate.”

O le pili a le Maota o le a atofaina ai le silia i le $2 piliona e vaevaeina i malo o atu motu, e tusa ma le $511 miliona le fesoasoani mo le Malo o Amerika Samoa e ui e ono toe faaitiiti e le Senate aofaiga mo malo a setete ma teritori.  Saunoa Amata “O le galulue faatasi i se ala ua au tasi ai itufaaupufai, ua iloga ai lo matou alualu ia mautinoa ai e tele ma talafeagai fesoasoani e maua e teritori.”

Governor Lemanu and Congresswoman Uifaatali with U.S. Senate Appropriations Committee Vice Chairman Richard Shelby (R-AL) in American Samoa in 2019
Afioga i le Kovana ia Lemanu ma le Tamaitaikonekeresi ia Uifaatali faatasi ai ma le Sui Taitatifono a le Komiti Faafoe a le Senate a le Iunaite Setete ia Richard Shelby (R-AL) i American Samoa i le 2019.

 

Na fautuaina mai e le Taitaifono o le Enetia ma Alamanuia Faalenatura a le Senate ia Joe Manchin (Sui Temokalasi mai le setete o West Virginia) le tau o le pili, ma o ia ma nisi Senatoa ua talanoa i ni fetuunaiga e ono faia.  Na pasia e le Maota o Sui a le Iunaite Setete e faaiu ai le vaiaso lea pili autu o le tupe faaalu ma auina atu i le Senate mo so latou finagalo.

Na faaauau le saunoaga a Amata “E pei ona talosagaina i la’u tusi i le susuga i le Taitaifono ia Manchin, ou te talitonu o le a toe tagai Amerika Samoa i le isi vagea o tupe fesoasoani tuusa’o atu i tagata taitoatasi ma aiga, faaopoopo tui puipuia ma fesoasoani i le tausiga o le soifuamaloloina, faitau miliona o alamanuia mo le Malo o Amerika Samoa, e aofia ai a tatou aoga ma le Kolisi Tuufaatasi a Amerika Samoa, fesoasoani mo meataumafa, faatasi ai ma le toe tatala atu o fesoasoani mo e ua aafia galuega e agavaa.”

E ui o loo i ai suiga ua faia e le pili a le Maota i totogi amata a le feterale mo setete, o nei suiga o le a le faaaogaina i totonu o Amerika Samoa, lea o loo gaoioi i le taimi nei i se fetuunaiga na faia talu ai, lea sa faatulaga ai le sii i totogi amata e 40 sene i le taitolu tausaga.

 

###