Talisapaia e Amata le $536,964 mai le NOAA e faasao ai Aau Amu

October 4, 2019
Fa'asalalauga Aloa'ia

Laumua i Uosigitone, —Aso Faraile, Na talisapaia e le Tamaitaikonekeresi ia Aumua Amata le $536,964 mo Amerika Samoa e faasao ai aau amu e ala mia le Taupulega a le malo e vaaia le sami ma le tau (NOAA).

O nei tupe ua maua e le Matagaluega o Alamanuia o le Sami ma le Vaomatua a Amerika Samoa i lalo o le Maliliega e feutagai ai mo le Faasaoina o Aau Amu.  E manaomia e le malō o Amerika Samoa le $49,588 o le tupe faafetaui.  

Saunoa Aumua Amata “O Amerika Samoa o se nofoaga matagofie, ma e tāua lava aau amu faasaoina i lo tatou siomaga ma le gataifale.  Ou te fia faafetai faapitoa i le Faatonu sili ia Va’amua Henry Sesepasara ma le Matagaluega o Alamanuia o le Sami ma le Vaomatua i a outou taumafaiga, faapea le NOAA mo le nei fesoasoani mai le malo feterale.”

O se vaega o le Porokalama a le NOAA e faasao ai aau amu lea o loo tuuina atu ai tupe mo galuega e faasao ai amu faapea suesuega faasaienisi i setete e fitu o le Iunaite Setete ma ona Teritori.  O nisi o nei galuega o loo aofia ai taumafaiga e foia ma puipui aau ua faaleagaina, ma tali atu i tulaga manaomia ona o suiga o le tau, faaotaota poo fagotaga. 

Saunoa le Faatonu o le Porokalama a le NOAA mo le Faasaoina o Aau Amu ia Jennifer Koss “O le oa o le gataifale ma ai o le tai e faalagolago ai le tamaoaiga tau gataifale o le atunuu e ala i mataaga e tosina mai ai turisi ma faatinoga e fiafia ai, puipuiga mai lologa ma afā, ma maua ai mea tausami.  Matou te moeiula e faaauau le faatupeina o suesuega ma faatinoga e faaititia ai le lamatia faalotoifale ma faaauiluma fuafuaga faasao ina ia tatou faatumau ai ikosite mo aau amu auā augatupulaga a sau.” 

O le NOAA o se vaega o le Matagaluega o Fefaatauaiga a le Iunaite Setete o loo taitaia e Dr. Neal Jacobs, o le Sui Failautusi o Fefaatauaiga mo le Vaaiga ma le Taumatega o le Siosiomaga,

###