Talisapaia e Amata se ripoti le faaituau o loo faailoa ai le tulaga ese o Amerika Samoa i le gatasi o le filifiliga o sui mo Aoga a Vaegaau o le Malo

August 16, 2019
Fa'asalalauga Aloa'ia

Uosigitone, D.C. – Aso Faraile, Na talisapaia e le Tamaitaikonekeresi ia Aumua Amata se ripoti e le o faaituau i se itufaaupufai mai le Aoga Faaloia a Yale ma vaega o Fitafita Tuai o loo auai na suesueina le filifiliga o tagata aoga mo Aoga a Vaegaau o le Malo a Sui uma o le Maota ma le Senate a le Iunaite Setete, ma maua ai le maoa’e o le tulaga ese o Amerika Samoa i le gatusa o le faatuina o alii ma tamaitai. E na o Amerika Samoa lava le itumalo i totonu o le malo na toeitiiti lava ausia le tulaga o le tutusa lelei o aofa’i o tagata faatuina mai itupa, ae sili teisi lava tamaitai faatuina i le aofai atoa, a o tagata aoga i le taimi nei mai Amerika Samoa e tolu tamaitai ma alii e to’a tolu o loo aooga i nei Aoga taualoa.  Mo se faataitaiga, i le amataga o le tausaga nei na faalauiloa ai le faamalo i tagata aooga e to’a lua, e tasi le alii tasi le tamaitai, ina ua talia e aoga i le Aoga mo Vaegaau a le Malo.

Congratulations to Aitulagi Alofa and her proud parents

Saunoa Aumua Amata, “E lagona lo’u fiafia o loo o gatasi le futia ma le umele i Amerika Samoa e tusa o avanoa mo e faatuina e aoga ai i Aoga a Vaegaaau a le Malo.  O lea foi ua toe tulaga maualuga Amerika Samoa e tusa o le tautua i le militeri, faatasi ai ma le tulaga maoa’e i le maualuga o tagata e ulufale atu i le militeri.  E maualuga lo matou naunautaiga i Aoga a Vaegaau a le Malo mai a matou tagata aoga e agavaa, ma o loo faia e a matou faiaoga ma aoga mea sili e fesoasoani ai i tagata aoga togi maualuluga ia latou malamalama e mafai ona latou maua lea avanoa. E momoli le faamalo ia te i latou uma, e amata i le Faatonu sili o Aoga ia Dr. Ruth Matagi-Tofiga ma i latou uma na galulue faatasi ma o tatou tagata aooga.  E momoli atu foi le faafetai i la’u aufaigaluega.”

O le nei ripoti a le malo aoao na tuufaatasia e le Aoga Faaloia a Yale i se soalaupule ma faalapotopotoga e lua a Fitafita Tuai: o le Connecticut Veterans Legal Center ma le Veterans Legal Services Clinic.  Na latou suesue tagata aoga faatuina mai le 541 o le aofai atoa o Senatoa ma Faipule a le Iunaite Setete, e aofia ai ma Teritori e ono.

Faaauau le saunoaga a le Tamaitaikonekeresi ia Amata, “O le mea sili, o se ai lea mo a tatou motu uma e tusa o lana tautua i le atunuu.  E taitoatasi ona Iloilo ma faatu e lo’u ofisa tagata agavaa.  E tāua tele le i ai o ni faataitaiga sili e vaai i ai nei tamaiti aoga, mai vasega talu ai nei ma i latou na tautua faaofisa i le militeri, ma o nei faataitaiga e aofia ai le anoano ta’ita’i tamaitai.  O se tasi o nei faataitaiga o loo i totonu o lo’u ofisa, le susuga i le Colonel ua ritaea ia Leafaina Yahn, lea o loo fai nei ma Ta’ita’i o le Aufaigaluega.”

I le amataga o Aokuso i tausaga uma, e galulue ai le sui a le ofisa faaitumalo a Amata o loo gafa ma mataupu tau aoaoga ma le Ta’ita’i o le Aufaigaluega e faatulaga tusi talosaga faapea le taimi faatulagaina e faauluina ai talosaga.  O kopi o nei tusi talosaga e lolomiina ma tauaaoina atu i aoga maualuga uma.  E masani foi ona talanoa le aufaigaluega a le Tamaitaikonekeresi ma fautua a aoga e uiga i taualumaga, ma fai feiloaiga i aoga maualuga e talanoa ai i tagata aoga e iai lo latou naunautaiga.  Ona o ia o se tasi na faauu mai Aoga a Vaegaau o le Malo, e malaga lava le susuga i le Ta’ita’i o le Aufaigaluega ia Leafaina Yahn i Amerika Samoa e auai i nei fonotaga ma talanoa i tamaiti aoga e uiga i tulaga na feagai ma ia a o aoga i Aoga a Vaegaau a le Malo ma tautua i le Ami.

amata and yahn

Saunoa Leafaina Yahn o se ua ritaea mai le Ami ma le faailoga maualuga o le Colonel, “Ou te iloa e avea ma faalaeiau mo alii talavou ae maise lava tamaitai talavou lo’u o’o atu ma latou taga’i ma faafofoga mai –o a’u o se tamaitai na ola ane i Amerika Samoa ma aoga ai ma tupu a’e i le aganuu Samoa ma avea le gagana Igilisi ma gagana lona lua, faau’u mai le Aoga a Vaegaau a le Malo ma ua manuia le tautua i le Ami mo le 26 tausaga.”

O le taualumaga e auai lava ma faatino le faagasologa.  O nisi o taimi, e fesoasoani le aufaigaluega o loo i Amerika Samoa e faatumu tusi talosaga mo Aoga a Vaegaau a le Malo on-line, o atu i aoga e aumai tusi talosaga ua uma ona faatumu, nonofo e tali ni fesili i taimi ua manava galuega ma tuua aoga, ma taulogologo ina ia faaoo tusitalosaga a o le i muta le taliaina.  A mae’a le aoina o tusitalosaga, e ulu e le Ta’ita’i o le Aufaigaluega le autaluga toto’a o nei tusitalosaga uma ta’itasi.  A fai ua sili atu le autalosaga na i lo avanoa ua atofaina, ona tofi lea o se komiti faafoe, e faatautaia e le Ta’ita’i o le Aufaigaluega, e filifili ai sui aupito sili ona agavaa e tusa lava poo le fea le itupā. (Talu ai o le toatele o a tatou aufaauu mai le Aoga a Vaegaau o le Malo o loo tautua pea, matou te vaai i le faitauaofai o a tatou Fitafita Tuai ma filifili ai Suiofisa ua ritaea ma Sui Sinia na siitia tulaga i filifiliga.) A faamaonia loa le lisi e le Komiti faafoe ma le Tamaitaikonekeresi, ona tuuina atu lea e le Ta’ita’i o le Aufaigaluega suafa e ala atu i le uepisaite a le Aoga a Vaegaau o le Malo a o le i oo i le aso e faagata ai (Ianuari 31). E i ai loa se sui ua filifilia mo se feiloaiga i se Aoga, ona valaau lea o le Tamaitaikonekeresi ia Amata i lea alo aoga ma ona matua e faailoa ma faamalo ia i latou, ona mulimuli ane lea faia se faasalalauga aloaia mo le nusipepa lotoifale, televise, leitio ma alaleo faasalalau ma faailoa i le faauuga a le aoga maualuga e ala i le auai o le Tamaitaikonekeresi, i soo se taimi e talafeagai.

Faai’u le saunoaga a Amata, “E lagona le fiafia mo e uma ua filifilia, ma ou te iloa o loo tapuai Amerika Samoa uma mo nei alo aoga faatasi ai ma isi o a tatou uo o loo tautua i le militeri i soo se nofoaga.  E tatau ma onomea mo nei alo aoga nei tofiga, ma o se mafuaaga lea e mitamita ai ma faagaeetia o latou matua ma faiaoga, faapea faafeagaiga ma isi, o aiga atoa ma afioaga i nei agavaa ua ausia.”

 

###

 

Issues: