Tusi Amata i le Loia Sili ia Barr e faamamafa ai le Tāua o Pisinisi Faifaiva a Amerika Samoa

June 20, 2019
Fa'asalalauga Aloa'ia

Uosigitone, D.C. – Aso Tofi, E talitonu le Tamaitaikonekeresi ia Aumua Amata e tatau le Faamasinogatonu i taualumaga a le faamasinoga i le Starkist, ae tatau foi i tagata o Amerika Samoa o loo faalagolago i le kamupani se faiga e tonu.

Na faailoa e loia fautua a le Matagaluega o Faamasinogatonu (Department of Justice) i se iloiloga i le faamasinoga e tolu itula na faia i le aso 17 o Iuni le sili atu o le tupe faafaigaluega a le Starkist i le TechPack Solutions, o se pisinisi faatekonolosi mo apa ma fagu o loo tu i Initia, na i lo le $100 miliona o le sala tupe e ono faasalaina ai le Starkist ona o lana vaega i le solitulafono o le faatulagaina e le tusa ai ma le tulafono o tau o oloa.  O loo talosaga le Starkist e faaitiitia le sala tupe i le $50 miliona ma ua faapea mai e le mafai ona faatau ese atu lana vaega i totonu o le TeckPack se i vagana ua faataga mai e vaega na aitalafu mai ai tupe e tusa o tuutuuga o nonogatupe. Ua ta’ua foi e le Starkist le faafitauli i le faatau ese atu o lana vaega.

Ona o lea finauga, ua finagalo ai le Faamasino o le Faamasinoga Faaitumalo a le Iunaite Setete, le afioga ia Edward M. Chen, e tolopo le iloiloga lea e faatulaga ai e ia le aofa’i o le sala a le Starkist se ia uma le iloiloga ia Aokuso 7 e faatatau i le mataupu i le TeckPack.  E $55 miliona ua uma ona totogi e le Starkist i sala poo aitalafu mai mataupu ua uma ona iloilo.  O lea foi ua taofi se fuafuaga e faaaoga ai le $77 miliona e faatelē ai le kamupani i’a ae faatali le iuga o le faamasinoga nei.

O Ianuari 23, 2019 na tusi ai le Tamaitaifaipule ia Aumua Amata i le afioga i le Faamasino ia Chen e uiga i lea mataupu. O loo faamamafa ai i lea tusi le tāua o pisinisi faifaiva ma le kamupani i’a i le tamaoaiga o Amerika Samoa ma ia augani i le faamasino ina ia taga’i i lea itu a o faia lana faaiuga. 

Na ia tusi foi i le asō le tusi o loo faapipii atu aga’i i le Loia Sili o le Matagaluega o Faamasinogatonu a le Iunaite Setete ia William Barr o loo atagia ai le atugaluga lava lea.  

“Ou te talitonu e tatau ma e faaauau pea le faia e le Faamasinoga ma le Matagaluega o Faamasiongatonu filifiliga tatau ma le talafeagai i tuuaiga o le faatulagaina o tau o oloa. E ui i le tatau ona i ai se faasalaga mo faiga solitulafono, e le avea lea ma tulaga e sala oti ai le kamupani i’a faapea tagata faigaluega e 2500 o Amerika Samoa o loo faalagolago lo latou tausiga i le i ai o le kamupani i’a i totonu o lo tatou motu.”

 

###