Faailoa e Amata le itu aso e tufa ai faamanuiaga tau mea taumafa mo fanau aoga
Fesoasoani tau Mea Taumafa mo Fanau pe a Tuua Aoga i le Tau Mafanafana mai le Porokalama Fou a le Matagaluega o Faatoaga a le Iunaite Setete (USDA)
Laumua i Uosigitone – Ua faailoa e le afioga i le Faipule Tamaitai ia Uifaatali Amata aso ua tuupoina e maua ai tufaaga mo le porokalama EBT i le tau mafanafana, ma faaali mai ai e le manaomia e matua poo fanau aoga ni mea e ao ona fai i le taimi nei. O le pule a le Konekeresi ua faatino ai e le Matagaluega o Faatoaga a le Iunaite Setete (USDA) se fuafuaga fou o se fesoasoani tau mea taumafa mo le fanau aoga i se galuega fai faatasi ma le Matagaluega o Tautua mo Tagata ma le mamalu lautele (DHSS) o le Malo o Amerika Samoa.
Na saunoa le Faipule Tamaitai “E le manaomia ona talosaga ma ia aua foi ne’i outou popole i le tuua o so outou, auā e faailoa atu e le Matagaluega o Tautua mo Tagata ma le mamalu lautele itu aso o tufaaga a o faaiuina lenei afa tausaga o aoga. E momoli le faafetai faapitoa i le susuga i le Faatonu ia Muavaefaatasi John Suisala ua ia silasila ma finagalo e vave talosaga i le Matagaluega o Faatoaga a le Iunaite Setete (USDA) e faagafua ai teritori mai le totogi o tupe e tusa ai. Ua faatupeina atoa e le malo feterale lenei taumafaiga talu le amataga mo teritori ma ua agavaa le toatele o fanau ma aiga o Amerika Samoa e tusa o taiala o tupe maua a le malo aoao mo le porokalama.”
A oo ina faaiuina lenei afa tausaga aoga ua tulaga tonu le porokalama, ona tau aao lea e aiga o fanau aoga cards ua iai seleni e faaaogaina mo faatau, e $59 tala le aofai i le masina e faatolu ona maua a o tuua aoga, i lona aofai e $177 tala e fai ai faatau o mea taumafa ma e o’o atu i le 14,000 i latou o le a maua nei faamanuiaga. E o’o atu i le $2.5 miliona tala mo le porokalama o le tausaga 2024, o seleni foaiina mai e le Matagaluega o Faatoaga a le Iunaite Setete (USDA) i le Matagaluega o Tautua mo Tagata ma le mamalu lautele (DHSS).
A taga’i ai e $19 tala e sili ai teritori pe a faatusa i nisi o setete. O le finagalo o le konekeresi na sii ai e le Matagaluega o Faatoaga a le Iunaite Setete (USDA) le aofai mo aiga i totonu o teritori e lima i le $59 tala i le tamaitiiti i le masina, e aofia ai le silasila i le eseesega o tau e feaveai ai oloa taumafa i atu motu ma le tulaga o le tamaoaiga a teritori, a o i latou i setete e $40 tala i le masina le aofai e maua i masina e tolu.
O loo faavae le porokalama EBT mo le tau mafanafana mai le porokalama EBT sa fai i le tau o le ma’i pesi ua tuanai atu, ua mafai ai ona vave faatino ma o se taunuuga o ni faiva fai faatasi a itu faaupu fai i le tele o tausaga ua alu ma galuega faaaoao. O le pule a le Konekeresi na faavae ai le porokalama i totonu o le Tulafono o le 2023 o le Tuufaatasiga o Seleni ua Atofaina (Tulafono Faalauaitele 117-328), na pasia ia Tesema 23, 2002, ma faaulufale i le 2024 e le Matagaluega o Faatoaga a le Iunaite Setete (USDA) ina ia faatupeina i tausaga taitasi e tusa ona atofaina e le Konekeresi.
###