Talia e Amata Feagaiga Folafola e Mausali ai Tupe Atofaina
Talia e Amata Feagaiga Folafola e Mausali ai Tupe Atofaina
Laumua i Uosigitone –Na faaalia le agaga faafetai o le afioga i le Faipule Tamaitai ia Uifaatali Amata e tusa ma le folafolaga o lenei vaiasosa o se feagaiga e faauma a’i faataamilosaga lua o tulafono tau faaulu o tupe atofaina mo le tausaga faaletupe. O le Aso Lua na tulei saunoa ai le afioga i le Peresetene ia Biden, le Fofoga Fetalai ia Mike Johnson, ma le Sui Aoao i le Senate ia Chuck Schumer ua sauni le Konekeresi e faaoo le vaega mulimuli o tulafono tau faaulu ina ia mafai ai ona faatupe atoa galuega fai a le malo o le Iunaite Setete, ma o le Aso Lulu na tuusaunoa ai lenei tulafono tau faaulu, e tomua ai palota e faia mulimuli ane i le vaiasosa nei. O le afa o matagaluega a le malo feterale ua mausali le faatupeina mo le tausaga faaletupe, ae o nisi e muta i le tulua o po ma ao i le Aso Faraile le faatupeina. O le talanoaina o tupe atofaina mo le Matagaluega e Puipuia le Lotoifale o le toe itu lea sa manaomia, ae peitai e ono tapunia i se taimi puupuu nisi o matagaluega e amata atu i le faaiuga o le vaiasosa ma e faalagolago i le faafoeina o le palota a le Maota sosoo ai ma le Senate.
Congresswoman Amata and Speaker Mike Johnson in the House of Representatives
Na saunoa le Faipule Tamaitai ia Amata “O le iai o le tupe mo le tausaga atoa e tua iai ma fai ai fuafuaga ua sili lea mo Amerika Samoa faapea le Iunaite Setete uma. E tele mea fita na faalavelave i taualumaga o lenei tausaga, ae o feagaiga na tasi ai itu faaupufai e pei ona folafola e mautinoa ai e faatupeina galuega taua e pei o le Matagaluega o Puipuiga, Setete, ma Tautua mo Tagata ma le lautele. E sili ona taua i totonu o le Pasefika le puipuiga faapea le tausiga o le va i fafo, ma e taga’i Amerika Samoa i le Matagaluega o Tautua mo Tagata ma le Lautele e maua ai seleni foa’i e faatupe ai tautua tau soifua maloloina.”
Na saunoa le Fofoga Fetalai ia Johnson i le Aso Lua e faapea “Ua fulisia finagalo mo tupe atofaina mo le Matagaluega e Puipuia le Lotoifale, ma o le a mafai ai ona faamae’a taualumaga mo tupe atofaina o le tausaga faaletupe 24. Ua amata sauniga a Komiti o le Maota ma le Senate i le gagana o le tulafono tau faaulu ia tuusaunoa ma lalafo iai finagalo o le Maota atoa faapea le Senate i se itu aso e vave mai.”
###