Auai Amata i le Fono Iloga a Itufaaupufai mo Vetereni
Laumua i Uosigitone – O le vaiaso nei na auai ai le Tamaitaikonekeresi ia Aumua Amata i se taeao iloga i le talaaga o le Maota o Sui a le Iunaite Setete, e pei ona feagai ai le Komiti o Mataupu tau Vetereni ma le uluai usugafono faifaatasi a itufaaupufai e le auai le tino ae fesootai i komipiuta (virtual forum).
Na auai le Tamaitaikonekeresi i lea fonotaga faaneionapo mai le ofisa o le konekeresi a Amerika Samoa, ma na aofia ai le tele o taualumaga masani na faatautaia e le Taitaifono. O le ulutala o lea fonotaga o le Tali atu i le Pesi o le Coronavirus. Na iloilo ai aafiaga o tautua mo le tamaoaiga ma le soifuamaloloina, atoa ai ma le taula'i i Vetereni e le o i ai ni fale o nonofo ai.
Saunoa Aumua Amata "E le o se uiga masani o le Konekeresi le suia o le faatautaiga o ana usugafono na sau ai, e tupu ai la le naunautaiga ma iloa le matagofie i le avea ma vaega o lea taeao fou i le talafaasolopito o le Maota. O le autū moni e le o le ala na usuia ai le fono, ae o le ogaoga o le tulaga o loo feagai ma nai Vetereni o si o tatou atunuu o loo matua manaomia le fesoasoani."
Auai le Tamaitaikonekeresi i se usugafono muamua o lea ituaiga a itufaaupufai e lua o le Maota.
O le faapupulaga na faia lea e le susuga i le tamaitai ia Kathryn Monet, o le Pule Sili mo le Mau a le Atunuu mo Vetereni e leai ni fale e nonofo ai (National Coalition for Homeless Veterans).
Na saunoa Amata e faamatala manaoga faapitoa o Amerika Samoa e pogai ona o lona tu ese ma e le lava alamanuia, ae ese foi le manuia pe a o'o i tagata e leai ni fale e nonofo ai ona o tagata o atu motu e tausi i ē latou te tuaoi. Tagai ane i le ata faasolo lea https://youtu.be/rMM-Qv4swLE.
O le Tamaitaikonekeresi ia Amata i totonu o le ofisa konekeresi a Amerika Samoa i le Laumua a o usuia le fono mo Vetereni.
E sili atu i le 20 porokalama o loo faatautaia e le Matagaluega o Mataupu tau Vetereni o loo galulue e fesoasoani i Veterni ma faasao i latou mai le leai o ni fale e nonofo ai. E 50 pasene ua faaitiitia ai le faitau o veterni e leai ni fale o nonofo ai talu le tausaga 2009, ua matauina i taumafaiga le solo i luma, ae o se faitau lata mai a le Matagaluega o Atina'e e Faalelei ai Fale ma nofoaga i Taulaga na fua faatatau ai, e tusa ma le 37,085 o veterni i se po e tasi ia Ianuari o le tausaga 2019 sa feagai ma le leai o ni fale e nonofo ai i totonu o le atunuu atoa.
Na talanoa le Komiti e uiga i le faatinoga o nei porokalama e tusa o le tautuaina o aiga ma taumafaiga e fesoasoani i le fausia o fale, e pei o le HUD-VASH, faapea le faasoaina o seleni mai le Tulafono iloga o le CARES ma tulaga o fesoasoani tau coronavirus mo Vetereni.
###