Auai Amata i se Iloiloga Faatautai i le Tali atu a le VA i le COVID-19

Laumua i Uosigitone –Na auai le Tamaitaikonekeresi ia Aumua Amata i se iloiloga faatautai lata mai nei a le Komiti o Mataupu tau Vetereni e fua ai le lelei o le Matagaluega o Mataupu tau Vetereni(faapuupuu i le faaperetania o le VA) i le tali atu i le COVID-19.

Saunoa Aumua Amata "Ua aafia matagaluega uma o le malo ma tagata latou te tautuaina i le ma'i pesi, ua aofia ai ma a tatou Vetereni. O nei tulaga ua tapu ai le mafai e latou ona malaga pe mulimuli i a latou fuafuaga e uiga i togafitiga ma talavai, ma ua mafua ai le manatu i tulaga tau seleni e le i fuafuaina, o nisi ia o nai popolega i le taimi nei e faailoa atu."

O lea iloiloga ia Iuni na faataunuuina i fesootaiga faaneionapo mo le tele o Sui, e aofia ai le Tamaitaikonekeresi ia Amata, lea sa auai lava i le tele o iloiloga a le konekeresi ma nisi o valaau ma fonotaga mai Amerika Samoa a o feagai le Maota ma taimi e galue ai i Itulagi.

Image

Na faaulutalaina le iloiloga faatautai a le Komiti Atoa o le "O le Faatatau i le Tali atu a le VA i le Ma'i pesi o le COVID-19: 90 Aso ua mavae. Na iloilo e le Komiti taumafaiga a le VA i le tausiga o vetereni talu le faalavelave faafuasei i le soifa maloloina o le mamalu latutele.

Na talanoaina e le Komiti faamatalaga faamauina i le soifuamaloloina o Vetereni, ma se faasologa lautele o mea tutupu o le COVID ma tali a le VA. Na ave le faamalo a Sui o le Konekeresi i le tele o itu o le taumafaiga a le VA, ae maise lava le vave ona tupu o le faaaogaina e le malo atoa o tautua faasoifuamaloloina lea e fesootai ai i ala faaneionapo, ma le manuia o galuega na feutagai ai ma le FEMA, a o iloilo luitau i le faatautaiga o le fela'uaiga o sapalai faapea le maua o meafaigaluega e puipui ai le tagata.

Na tuuina atu fesili a le Tamaitaikonekeresi ia Amata ia Dr. Richard Stone, o le Faatonu ua tofia, Pulega o le Soifuamaloloina o Vetereni, ia faasolo ai le faatalanoaga i le mafai ona maua tausiga faasoifuamaloloina i fesootaiga faaneionapo faapea le soifuamaloloina o le mafaufau. Na augani le tamaitai ia faaauau le faatāua o le faaitiitia o le taimi e faatali ai, ia feagai ma le anoano o mataupu e le i mae'a, tulimata'i tulaga manaomia i le maloloina o le mafaufau, faamautinoa ua amanaia tagata uma, ma faamuamua mataupu ua manaomia vave se fofo.

E lima mataupu autu na talanoaina e le Komiti i le iloiloga: O agavaa a le VA e faia suega o le COVID-19 ma tulimata'i fesootaiga ma taualumaga; Taiala a le VA mo vetereni ma tagata faigaluega e uiga i le vavae ese mai ma isi ma le taofi o le fesootai ma isi tagata; o luitau na feagai ma le VA e tusa ma le felauaiga o sapalai ma le faatautaiga o faamaumauga mo meafaigaluega e puipui ai le tagata; fesoasoani a le VA o loo tuuina atu mo Maota o Vetereni i Setete, maotai tausi ma'i i le atunuu, ma falepuipui; ma tapenaga a le VA mo tulaga o le toe alu i luga o e afaina i le COVID-19 i masina a sau.

O faamatalaga i le soifuamaloloina mai le Matagaluega o Mataupu tau Vetereni i le COVID-19 o loo maua i le https://www.publichealth.va.gov/n-coronavirus/index.asp

O fesoasoani mo le soifuamaloloina o le mafaufau mai le Matagaluega o Mataupu tau Vetereni e maua i le https://www.mentalhealth.va.gov/coronavirus/

O le fesootaiga mo Vetereni ua pagatia ma pule i le ola e maua i le https://www.veteranscrisisline.net/

###