Auina mai e Amata se Otootoga o Fesoasoani e tali ai le COVID-19 mo Amerika Samoa

Luamua i Uosigitone – Aso Tofi, Ua tuuina mai e le Tamaitaikonekeresi ia Aumua Amata le nei otootoga e uiga i fesoasoani e tali atu ai i le coronavirus mai le Konekeresi ma tulaga e aofia ai Amerika Samoa.

Na pasia e le Konekeresi a le Iunaite Setete ni vaega fesoasoani e tolu i le tali atu i le pesi o le COVID-19

• E $8.3 piliona i seleni mo faalavelave faafuasei ua tuuina mai i lalo o le Tulafono e uiga i Faaopoopoga ua Atofaina mo le Nofosauni ma le Tali atu i le Coronavirus (H.R. 6074) mo matagaluega a le feterale e tali atu ai i le pesi o le coronavirus.
• O le Tulafono e Faamuamua ai Aiga i faiga e Tali ai i le Coronavirus (FFCRA)(H.R. 6201) ua maua mai ai suega o le COVID-19 e fai fua, faalautele fesoasoani mo meataumafa, alu i luga seleni atofaina mo Medicaid a teritori, ma faaopoopoga o puipuiga mo tagata faigaluega o loo tausia le soifuamaloloina.
• O le Tulafono e Fesoasoani i le tali atu i le Coronavirus, Laveai, ma le Faamautuina o le Tamaoaiga, poo le "Tulafono CARES" (H.R. 748) ua maua mai ai le silia i le $2 tiliona o fesoasoani mo aoga, falemai, tagata faigaluega ua faamalolo, pisinisi laiti, ma faigamalo a teritori.

Fesoasoani tuusa'o atu mo Tagata taitasi ma Aiga ua aafia i totonu o Teritori a le Iunaite Setete

Totogi tau tupe: Ina ia tali atu i ni faafitauli faafuasei tau seleni, ua tatala e le Tulafono CARES le tuusa'o atu o seleni e $1,200($2,400 mo ulugalii) i tagata uma i totonu o Teritori a le Iunaite Setete e i lalo ifo o le $75,000($150,000 mo ulugalii) le tupe maua. I luga atu o lea aofaiga faatulagaina, o le a faaitiitia penefiti i le $5 e toese mai i $100 uma o le tupe maua ma e oo lava i le leai o se penefiti e maua mo ē e $99,000 pe sili atu (198,000 mo ulugalii) o latou totogi.

Faalautele Fesoasoani mo ē le Faigaluega: O loo tausia i lalo o le Tulafono CARES ē ua le faigaluega e le pogai mai ia latou lava e mafua ona o le COVID-19. O loo aofia i le Tulafono se faalautelega maoa'e ma suiga o le porokalama inisiua mo ē le faigaluega i totonu o teritori i faatulagaga o loo i ai ma le porokalama fou e Fesoasoani i ē Le Faigaluega ona o le Ma'i pesi i totonu o teritori e le o i ai i le taimi nei ni inisiua mo ē le faigaluega. O le agavaa mo lea fesoasoani e aofia ai tagata faigaluega i le taimi atoa"full-time" ma tagata faigaluega na o se vaega o le taimi "part-time", tagata ua faafaigaluega o ia e ia lava "self-employed", ma ē maua le tamaoaiga i gaulega faakonekarate tumaoti "gig economy workers". O teritori o loo i ai porokalama faapea ua faaopoopo i ai penefiti mo ē le faigaluega mo le 13 vaiaso. I totonu o teritori e le o i ai inisiua mo ē le faigaluega, e avanoa penefiti e oo atu i le 39 vaiaso, ae le i tala atu o le faaiuga o le 2020; ma le fesoasoani faalevaiaso mo ē le faigaluega e mafua i le ma'i pesi o le a avea ma aofai faatulaga a le malo aoao mo penefiti i ē le faigaluega. Ae le gata i lea, o tagata e maua penefiti a ē le faigaluega i teritori uma o le a maua le $600 i le vaiaso i Totogi mai le Feterale mo ē ua le toe faigaluega ona o le ma'i pesi ua ofoina atu mo latou nei i totonu o le atunuu aoao e oo atu ia Iulai 30, 2020. O le a faatautaia nei porokalama e faigamalo a teritori. O seleni fou uma ua auina mai e le Vaega o Tupe a le Iunaite Setete.

Faalaeiau i a tatou Fomai ma Soatau o loo i le taumua

Fesoasoani i Falemai ma Toa o loo tausia le soifuamaloloina: E le mafai ona fofo lo tatou tamaoaiga se i vagana ua taofia le pesi o le COVID-19. O tulafono fou o le COVID-19 e tolu ua maua ai seleni mo falemai ma faletalavai i totonu o teritori a le Iunaite Setete, e pei o le Iunaite Setete atoa. O loo aofia ai: le $100 piliona mo falemai ma faletalavai e totogi ai pili o togafitiga e le i toe totogia poo seleni sa faamoemoe e maua a ua faaletonu ona o le coronavirus ma le $950 miliona e lagolagosua ai i teritori ma setete i faatinoga faasoifuamaloloina mo le lautele e tali ai i le pesi o le COVID-19 e ala atu i le Fale mo le Faatautaiga ma le Puipuia mai Faama'i.

Puipuiga o le Aufaigaluega e tausia le soifuamaloloina; E manaomia e i latou o loo tausia le soifuamaloloina meafaigaluega uma e mafai ona tatou maua e puipuia ai i latou. O le manulauti a tulafono COVID-19 ua pasia e le Konekeresi le sii o la tatou faaputuga o ufifofoga(masks), totigilima, laei falemai (gowns), ma isi meafaigaluega aoga e puipui ai le tagata(PPE) ma aofia ai le $16 piliona mo le Fuafuaga Faalemalo e teufaaleoleo meafaigaluega e manaomia, $4.3 piliona mo le CDC, ma le $1 piliona mo matagaluega tau soifuamaloloina mo lea faamoemoe.

Lagolagoina o Pisinisi Laiti

Porokalama e Puipuia ai Totogi: O le Porokalama e Puipui ai Totogi e ala atu i le Taupulega o Pisinisi Laiti ua aofia ai le $350 piliona i seleni mo nonoga tupe e leai ni tau e totogia i falefaigaluega o loo totogi pea a latou tagata galulue i le nei tau pagatia.

Nonoga tupe mo le Afaina Faafuasei o le Tamaoaiga; Ina ia tali atu i atugaluga o le taimi nei e uiga i le alu o le tupe (cash flow), ua aofia i totonu o le Tulafono CARES le $10 piliona mo seleni e mua'i te'a atu(advances) e $10,000 i pisinisi laiti ma faapotopotoga e le maua se tupe mama (nonprofit) e talosaga mo nonoga tupe mai le SBA ona ua pagatia le tamaogaia (EIDL). O nei nonoga tupe e maulalo le tupe tului e totogi, e oo atu i le $2 miliona, e ono faaaoga e totogi ai pili sa ono mafai ona totogi pe ana le tupu le coronavirus, e aofia ai totogi o tagata faigaluega ma nisi pili mo galuega faatino.

Seleni mo Faigamalo a Teritori

Seleni Fesoasoani tau Coronavirus: O loo aofia i le Tulafono CARES le $3 piliona mo teritori o le Iunaite Setete ma malo o le Itumalo o Columbia. O le a tuusa'o atu lava e le Vaega o Tupe a le Iunaite Setete i teritori taitasi la latou vaega, e faatatau e tusa o le faitauaofai o tagata, i totonu o le 30 aso.

Seleni Faaopoopo mo le Medicaid: Ua faalaititi e le FFCRA le vaega a teritori e tatau ona totogi i le Medicaid se ia mae'a le pagatia mai le COVID-19. Ua sii foi e le FFCRA le aofai o seleni a le feterale mo le Medicaid e avanoa mo teritori mo le tausaga 2020 ma le 2021. E fesoasoani nei suiga ina ia mautinoa ai o loo i ai seleni mo porokalam Medicaid a teritori e tali atu ai i le coronavirus.

Fesoasoani mo Meataumafa: O loo avanoa fesoasoani faaopoopo mo meataumafa e ala atu i le porokalama o loo fesoasoani i le maua o meataumafa (SNAP) mo le U.S. Virgin Islands ma Kuameni. O le a vaevaeina i le va o Amerika Samoa, Motu o le Mariana i Matu, ma Puerto Rico se faaopoopoga e $300 miliona mo a latou porokalama e fesoasoani mo meataumafa ina ia maua ai e tagata taitasi ma aiga meataumafa latou te manaomia.

Seleni Faaopoopo mo Aoga: Ua maua mai le Tulafono CARES se seleni ua tuuese faapitoa e oo atu i le $153 miliona e tufaina atu e le Failautusi o Aoga e fua i manaoga tau aoga i Motu o le Mariana i Matu, Kuameni, U.S. Virgin Islands ma Amerika Samoa.

FAUTUAGA O lea faamaumauga ua faamoemoe e tuuina atu ai se uluai taiala e faatatau i le faamoemoe o le Konekeresi ma e le o aofia ai se fautuaga faaletulafono. Ma e le suitulaga foi i taiala aloaia o faagasologa mai matagaluega a le feterale ma teritori o loo aofia ai.