Faailoa e Amata i Ekalesia fesoasoani a le SBA mai le Tulafono CARES

Laumua i Uosigitone – Aso Lulu, Tamaitaikonekeresi ia Aumua Amata i ekalesia i totonu o Amerika Samoa le tuuina atu e le Konekeresi o auala e maua ai fesoasoani e mafai foi ona faatatau i ekalesia ma faalapotopotoga e le maua ai se tupe mama e agavaa i totonu o le Tulafono CARES e ala atu i le Pulega a Pisinisi Laiti (SBA), ma e mafai e lea fesoasoani ona totogi le tele o pili mo vaiaso e valu.

Saunoa Aumua Amata "Ua tapunia mo le taimi nei puipui o a tatou malumalu tapua'i, ae o loo i ai pea pili e ao ona totogi. I lalo o le Tulafono CARES, e mafai e ekalesia ona maua le fesoasoani faapea e pei o pisinisi laiti i nei taimi faigata e totogi ai nei matafaioi, e pei o totogi o tagata faigaluega, tupe tului o mokesi, pili mautotogi ma isi pili e pei o le vai ma le uila.

Ua faatulaga lea fesoasoani e avea ma nonoga tupe mo se taimi puupuu, peitai, i totonu o nei nonoga tupe e mafai ona faamagalo vaiaso e valu o ni pili totogi. O le nei auala e manaomia e se ekalesia ona talosaga mo se nonoga tupe mai le SBA, ma o tuutuuga o le nonoga tupe ua faatulaga e faamāmā ai mafatiaga i le tamaoaiga.

Muamua, o peimeni mo le nonoga tupe i soo se pili totogi e sili atu i le valu vaiaso o le a faamalumalu mo le ono masina. O lona lua ma o le tulaga e sili ona tāua, o le a faamagalo e le SBA le vaega o le nonoga tupe ua faaaoga e totogi ai uluai vaiaso e valu i totogi o tagata, pili mautotogi, isi pili e pei o le vai ma le uila ma nisi, ma le tupe tului o le mokesi – faasao ai le valu vaiaso mai le tele o mea totogi masani faalemasina a ekalesia.

Faaauau le saunoaga a Amata, "Ou te malamalama i le ua'i atu o tatou tagata i a tatou tapuaiga masani lea ua taofia. O se vaega tāua i o tatou afioaga ma le soifuaga. E lelei mo le silafia o loo i ai nei auala e faamautu ai tulaga tau seleni i ekalesia i nei vaitau."

O le nei taumafaiga fai faatasi a le Vaega o Tupe a le Iunaite Setete ma le SBA, e faagafua ai e le SBA le tele o tulaga masani e tatau e faamau auā le toe totogi o aitalafu, folafolaga faamautinoa, poo tau e ao ona totogi a le SBA ina ia faigofie ai ona maua lea fesoasoani. O nei seleni ua maua o se vaega o le $349 piliona a le Porokalama e Puipui ai Totogi o tagata na faavae e le Tulafono CARES.

Faaiu le saunoaga a Amata "E faafetai faapitoa i a tatou ositaulaga uma ma ta'ita'i o ekalesia i o latou faiva uma e filemu ai o tatou motu. E faafetai atu i le Peresetene ia Trump, le Failautusi o Tupe ia Mnuchin ae maise le Pule o le SBA ia Jovita Carranza i le vave o gaoioiga i le nei porokalama tāua."

O le sootaga lea e iloa ai pe "faapefea ona talosaga" https://www.sba.gov/funding-programs/loans/paycheck-protection-program-ppp.

O nei e tagai ai auā faamatalaga tonu e te manaomia e talosaga ai https://www.sba.gov/document/sba-form--paycheck-protection-program-ppp-sample-application-form.

###