Faamoemoe Amata i le Sili o le Seleni mai le Feterale mo Amerika Samoa i le 2021, Faaopoopo Taisautuamiliona mo Aoga

Laumua i Uosigitone – Aso Lulu, Na saunoa le Tamaitaikonekeresi ia Uifaatali Amata ua tagai nei Amerika Samoa i le lua o tausaga sosoo o sili le seleni maua mai le feterale i le 2021 – ua oo atu i le tusa ma le $511 miliona i seleni faapitoa ma le seleni fou ua faato mo aoga e oo atu i le $150 miliona i Amerika Samoa – o se vaega o le $1.9 tiliona (trillion) o le pili fesoasoani na pasia e le Maota o Sui a le Iunaite Setete ma na auina atu i le afioga i le Peresetene ia Biden ia tusia e avea ma tulafono.

Na atofaina e le Konekeresi le silia i le $2 piliona o le a vaevaeina i vaega e fa o faiga malo a atu motu (Amerika Samoa, Kuameni, CNMI, USVI) e maua ai le tusa ma le $511 miliona mo Amerika Samoa.

Saunoa le Tamaitaikonekeresi ia Amata "O le faamuamua na ou ave i le saili o faiga tutusa e faapei o setete, e pei ona faaalia i a'u tusi i le afioga i le Peresetene ia Biden ma le susuga i le Taitaifono ia Manchin, ma na manuia le galulue faatasi ma teritori. E le gata i le fesoasoani tau COVID ua tuu sa'o atu ma tui puipuia, e tele foi seleni fou mo aoga o le a maua, ma e fiafia ai i le tagai atu i ni fua o nei seleni ua faato mo a tatou aoga."

Image

E $850 miliona na tuu ese e le Konekeresi mo le Failautusi o Aoga a le Iunaite Setete e faasoa atu o seleni mo aoga a faiga malo o atu motu. O le a agavaa vasega K e oo i le 12 a Amerika Samoa mo le tusa ma le $150 miliona o seleni e faalelei ai aoga mai nei tupe, e aofia ai ma atina'e autu. O le a agavaa foi le Kolisi Tuufaatasi mo faaleleiga ma seleni fesoasoani mo i latou lava.

Na saunoa Amata "O le $1,400 o seleni ia e totogi sa'o i tagata taitoatasi e amata ona alu atu pe a uma ona aloaia le avea o le pili ma tulafono. O porokalama mo pisinisi laiti o le a maua i se taimi lata mai fesoasoani faaopoopo, faatasi ai ma porokalama eseese e ala atu i le Malo o Amerika Samoa, e pei o fesoasoani mo meataumafa, fesoasoani mo e ua afaina galuega e agavaa ma nisi tupe mai le feterale.

Na atofa foi e le Konekeresi le $7 piliona i le malo aoao e galueaiina ai ala e ui ai fesootaiga (broadband) i nofoaga e mamao ese mai le taulaga poo nofoaga o loo feagai ma faigata i le tamaoaiga.

Na faaauau le saunoaga a Amata "E atofa e le Konekeresi seleni, ona iloa tonu lea o le faasoa i matagaluega ma vaega eseese a le feterale. O le a tagai nei Amerika Samoa i ni seleni mai le feterale e pei o seleni na maua mulimuli mai i le tulafaono CARES i le tausaga ua mavae atu. O le a ou faailoa atu pea mo lou silafia."

O le lona ono lea o fesoasoani tau COVID ma le pili fesoasoani mo le tamaoaiga na pasia e le Konekeresi talu Mati o le tausaga e 2020.