Faataua e Amata le atoaga o le 245 tausaga o le Ami a le Iunaite Setete
Laumua i Uosigitone – Aso Tofi, Ua aloaia e le Tamaitaikonekeresi ia Aumua Amata le atoaga o le 245 tausaga o le Ami, a o le i aulia Iuni 14, lea e faailoga ai le faavaeina o le Ami i le 1775. O Iuni 14 foi e faamanatu ai le talia e le malo aoao o le tagavai a le Iunaite Setete i le 1777. O le saunoaga lea a le tamaitai:
" O le tausaga nei ia Iuni 14, e faamanatu ai e le Ami a le Iunaite Setete le 245 tausaga o le tautua lotonuu tumau i lo tatou atunuu. Ua mavae nai aso na muai pulea ai e vaega au le fanua i Boston, na tuuina atu ai ia Siaosi Uosigitone le tofiga maoae o le avea ma uluai Taitai au."
"E maoae le tautua ua faamauina mai nei i Amerika Samoa na tapena e o tatou tagata, ma o i nei e tagai mai ai Amerika i tausaga uma auā ni toa matapala mo le malo. Tatou te mitamita i a tatou fitafita. E faamalo atu i a tatou fitafita uma taitoatasi o loo tautua i le Ami poo Vetereni o le Ami, ona o le aso le nei e faasino ia te outou, faapea ē na mua i malae. Ua tupu olaola le tu matagofie a o tatou motu talu mai le tautua a lo'u tamā i totonu o le Ami i le Taua lona lua a le lalolagi. O le mafuaaga lea ou te iloa ai le aoga o le nei aso e faamanatu ai i le toatele o a tatou aiga militeri a latou pele, o le tele o taimi o loo mau i nofoaga mamao. Ia faamanuia le Atua i ē o loo tautua, a tatou Vetereni, ma aiga ua aunina atu a latou lupe faalele e tautua i vaega au a le malo."
"E fetaui tonu lea aso ma le aso i le tausaga 1777 na filifilia aloaia ai e le malo le tagavai a le Iunaite Setete. Matou te faamanuia atu le aso fanau i le Ami a le Iunaite Setete ma le Tagavai o Meleke."
Faitau atili e uiga i le faavaeina o le Ami a le Iunaite Setete i nei HERE.
###