O Amata o se Ulua’i Suilagolago i se taumafaiga e faalauaitele ai Tausiga Faasoifuamaloloina mo Vetereni a le Pasefika

Uosigitone, D.C. – Aso Tofi, Ua faailoa mai e le Tamaitaifaipule ia Aumua Amata o ia o se tasi o ulua'i suilagolago o se pili fou i le nei vaiaso e faalauaitele ai tausiga faasoifuamaloloina mo Vetereni a le Pasefika na faauluina e se vaega aufaatasi a itufaaupufai e toalima Sui na taitai e Tulsi Gabbard le na fai ma Tamaitaifaipule a Hawaii i le 02, faatasi ma le Tamaitaifaipule ia Aumua Amata o Amerika Samoa; le Ao o le Maota, le Faipule ia Don Young o Alaska; le alii Faipule ia Ed Case o Hawaii; ma le alii Faipule ia Michael San Nicolas o Guam. O lea pili o le a faalelei ai auala e tali ai manaoga tau soifuamaloloina o Vetereni mai Setete Sa'oloto – Palau , Motu o Marshall ma Setete o Maikoronisia – o vaega uma o le maliliega COFA ma le Iunaite Setete.

Saunoa le Tamaitaifaipule ia Aumua Amata, "E manaomia e a tatou Vetereni o i tuluiga uma la tatou fesoasoani ma le tausiga. E faafetai i le Tamaitaifaipule ia Gabbard mo lea pili o le a aogā i nisi Vetereni e onomea ai o loo alala i le Pasefika, ma fesoasoani e atina'e aiaiga sili mo le lumana'i o tausiga mo Vetereni."

Saunoa le Faipule ia Tulsi Gabbard, "Na tali Vetereni i lo latou valaauina ma ofoina atu o latou soifua e tautua lo tatou atunuu. E nofo ae olo i le agaga faafetai lo tatou atunuu ma e ao ona mautinoa o loo maua e i latou le tausiga e tatau ma onomea, tusa lava poo fea o loo aumau ai. O le maliliega COFA mo Vetereni o se laasaga muamua lea i le faamautinoaina lo tatou faataunuu o la tatou tausiga mo a tatou vetereni uma.

Saunoa le Faipule ia Don Young, "A ofoina atu se tasi lona soifua e puipui ai le Iunaite Setete ma mea e tāua ia i tatou e ala i le avea ma totino i vaega au a le malo, e tatau ona maua e i latou tausiga faasoifuamaloloina ua tatau mo i latou. E toatele Vetereni a le Iunaite Setete o loo i le Pasefika – e aofia ai i latou o i Palau, Motu o Marshall, Setete o Micronesia – latou te le maua le avanoa i tausiga faasoifuamaloloina ma ua faamalosia e totogi e i latou lava tupe e tele e malaga mamao ai e saili fofō. Ua uma ona tatou folafola atu i a tatou Vetereni, ma e tusa lava poo fea o i ai i latou, e tāua le faaauau o la tatou tausiga mo i latou. O le nei pili o le a faalauaitele ai nei tausiga mo nei vetereni ma ou te mitamita ai e lagolagoina. Ou te faafetai i le Tamaitaifaipule ia Tulsi Gabbard mo lana faatautaiga i le fai ai ma sui o a tatou vetereni, ma i le Konekeresi, o le a faaauau pea le faamuamua o le fesoasoani mo a tatou toa."

Saunoa le Faipule ia Ed Case, "O se folafolaga na faia i totino o vaega au a le tatou malo e tatau lava ona tatou tausi i ai. E tatau foi lea mo e na tali i lo latou valaauina e tautua mai motu o setete sa'oloto. Afai ua manaomia e i latou le tausiga e pei ona folafolaina atu, e tatau ia i tatou ona faamautinoa e le o iai ni tulaga e vaoia ai lo latou mauaina o nei tausiga ua manaomia e i latou."

"I le va lelei ma le Setete Aufaatasi o Maikoronisia (FSM), e lagona lo matou faamalieina i le matau atu i le faauluga o le maliliega COFA mo Vetereni, o le a faavae ai se porokalama faataitai mo vetereni i le tolu tausaga e faalauaitele ai le maua e vetereni o aumau i le Pasefika tausiga faasoifuamaloloina, e aofia ai FSM. Matou te faamalo atu i le Faipule ia Gabbard i lana faatautaiga o le nei pili tāua o le a fesoasoani i vetereni o loo aumau i setete sa'oloto o loo i le taimi nei e malaga mamao e faaaoga ai a latou penefiti mo tausiga faasoifuamaloloina mai le VA," saunoaga lea a le Peresetene o Setete Aufaatasi a Maikoronisia ia David Panuelo. "Afai e pasia le nei pili, o le a faigofie ona maua e le afe ma afe o vetereni nei tausiga, o e na aloaia le latou tautua i le militeri a le Iunaite Setete."

O le pili lea o le COFA mo Vetereni o le a faatonuina ai le Failautusi o Mataupu tau Vetereni ina ia faataunuu se porokalama faataitai i le tolu tausaga e maua ai tausiga ma tautua faafalema'i e vetereni o loo aumau i setete sa'oloto faapea le maua ai o faamatalaga e fesoasoani i se sailiiliga e fautua ai pe ono faavae ni fale mo vetereni i nei atunuu ma tatau ai i le Failautusi a le VA ona toe faatulaga faamaumauga o le faitauaofai o vetereni o loo aumau i setete sa'oloto (FAS), mai nisi o mea o loo manaomia ona faia.