Pasia e le Komiti se tasi o pili o loo suilagolago ai Amata mo le faitau miliona mo le Medicaid mo Amerika Samoa

Uosigitone, D.C. – Aso Lulu, Na fiafia lava le Tamaitaikonekeresi ia Aumua Amata i le vave o le faaauauina o le faagasologa mo le pili aufaatasi a itufaaupufai mo le soifuamaloloina, na faauluina i le vaiaso ua mavae, e maua ai faitau fia sefulu miliona o tupe mo le Medicaid i Amerika Samoa.

Na auai le Tamaitaikonekeresi ia Amata i le atinaega o lea pili aufaatasi a itufaaupufai ma o ia foi o se ulua'i suilagolago i le tulafono e Faaleleia ai le Tausiga Faasoifuamaloloina mo Teritori, H.R. 3631. Na pasia lea tulafono e le Komiti o Enetia ma Faafetauaiga, o se vaega o se pili autu lea foi na avea ai o ia ma se tasi o suilagolago. Ua avea nei le tupe mo le Medicaid a Amerika Samoa ma vaega o le pili Title 5 of H.R. 2328, O le Pili mo le Soifua Maloloina, Faiga Faaonaponei, ma le Faaleleia Atoa o le Atunuu (faatasi ai ma le pili e taofia ai pili falema'i e le i fuafuaina), ma o le i si laasaga e sosoo ai o le taga'i ai o le Maota atoa.

Saunoa Aumua Amata, " O le nei pili e faamautu ai tausiga faasoifuamaloloina ma seleni a Amerika Samoa, ma mafai ai ona faaaoga tupe a le Teritori mo galuega autu e pei o taumafaiga e faaleleia ai le Maota Gasegase poo meafaigaluega.. O lea pili ua vave lona faagasologa ona o le lagolagosua mai itufaaupufai e lua ma o lona uiga o le a maua ai le faitau fia sefulu o miliona o tupe maua mo le tatou porokalama Medicaid. E le gata i maua tonu o nei penefiti, ae o le a o'o atu i le ono tausaga le umi."

O lea pili e faasinotonu i le maua o le sii tele mai tupe feterale mai le $12 milliona aga'i i le $84 milliona i le tausaga. O loo aofia i lea pili le 100 pasene e totogi e le feterale mo le i si lua tausaga o i luma ma e le tau totogia e le malo o Amerika Samoa se vaega e o'o atu i le tausaga 2021. I tausaga o le a mulimuli mai, o le a 83 pasene e totogi e le malo feterale i tausaga 3-5 ona totogi ai lea e le malo lotoifale le 17 pasene, ma e i'u ai i le totogi e le feterale le 76 pasene ae 24 pasene e le malo lotoifale i le tausaga mulimuli o tausaga e ono ua faatulagaina.

Saunoa le Tamaitaikonekeresi ia Amata "O pasene na galulue mai ai Teritori e 55 e totogi e le feterale ae 45 e totogi e teritori ma o nei fetuunaiga fou o le a tele le suiga e maua ai. O le faitau fia sefulu o miliona mai tupe feterale mo nei tautua o le a fesoasoani ma faasao ai tupe a le Teritori e faaaoga mo isi galuega e tatau ona faamuamua."

Na faailoa le faafetai a le Tamaitaikonekeresi ia Amata i le faatautaiga i lea taumafaiga e ala i lona sapaia o le Faipule ia Darren Soto o le Sui Temokalasi mai Florida, ma Gus Bilirakis o le Sui Ripapilikana mai Florida, faapea le Taitaifono ia Frank Pallone o se Sui Temokalasi mai New Jersey ma le Sui Sinia ia Greg Walden o se Sui Ripapilikana mai Oregon.

###