Pasia e le Maota le Pili mo Vetereni o le Blue Water Navy lea sa avea ai Amata ma se tasi o sui lagolago
Uosigitone, D.C. – Aso Lulu, Ua talia e le Tamaitaifaipule ia Aumua Amata le pasia e le Maota o le pili na autasi ai itu faaupufai mo Vetereni a le Vietnam Blue Water Navy, lea na avea ai o ia ma se tasi o sui lagolago ma ia sapaia i se palotaga a le Komiti i le vaiaso ua te'a. O le Aso Lua, sa faia ai se faatasiga a le Tamaitaifaipule ia Amata ma nisi Sui o le Konekeresi i le Laumua i se faasalalauga auā le sapaia o le nei pili mo Vetereni o le Blue Water Navy ma faatāua ai le tausiga o lo latou soifuamaloloina ma le latou tautua.
Saunoa Aumua Amata, "O se mitamitaga faapitoa ia i tatou le sapai o a tatou Vetereni i Amerika Samoa, ma o le nei pili o loo aofia ai fesoasoani tāua mo nisi o Vetereni o loo o latou manaomia. O i latou na tautua i ogasami i Vietnam na feagai ma tulaga mata'utia faapea le ono lamatia o lo latou soifuamaloloina e tatau ona amanaia. O lea pili e fesoasoani e faatumau lea tausiga ma aloaia ai i latou uma na tautua. E i ai lo'u tuagane na tautua i le Navy i le vaitau lea, e aofia ai le Gulf of Tonkin, ma e lagona le faamalieina i le matau atu o loo aloaia lea sāvali ma pasia lea pili e le Maota."
Le Tamaitaifaipule ia Amata ma le Taitaifono ia Mark Takano (o loo saunoa) ma le Sui Sinia ia Dr. Phil Roe i le lagolagoina o le Pili mo Vetereni a le Blue Water Navy
O le Pili H.R. 299 ua faatulaga ina ia aofia ai Vetereni o le Blue Water Navy, o e sa tautua i ogasami o Vietnam, e agavaa ai i se fesoasoani auā gasegase e masalomia na mafua ona o le tautua e fesootai ma aafiaga ona o le feagai ma vailaau oona e pei o le Agent Orange. O se tulaga tāua tele lea mo nei vetereni ma o se vaega tāua o le faatumauina o le tausiga a le atunuu e pei ona folafolaina atu i vetereni."
O le tausaga ua te'a na saunoa ai le Tamaitaifaipule ia Amata i luma o le Maota o Sui a le Iunaite Setete e lagolago le pili mo Vetereni a le Blue Water Navy. Na avea foi le Tamaitaifaipule ia Amata ma sui lagolago o le pili i le 2018 ina ua pasia e le Maota, peitai, e le i pasi ma le Senate ae ua mae'a le nofoaiga 115 a le Konekeresi, o lea la na toe faaulu ai i le tausaga nei ma ua tele le lagolagosua mai le Maota.