Pasia e le Senate tuutuuga na talosaga e Amata mo le $18 Miliona o le Fesoasoani mo Meataumafa mo Amerika Samoa, ma le 100% mo le Medicaid
Uosigitone, D.C. – Aso Faraile, Ua fiafia le Tamaitaifaipule ia Aumua Amata e faailoa atu i lana vaega le pasia e le Senate a le Iunaite Setete le pili e fesoasoani i faalavelave o loo aofia ai le talosaga a Amata mo le $18 miliona e fesoasoani i meataumafa mo Amerika Samoa, ma lana talosaga mo le 100% mo le Medicaid. I lalo o lea pili fou, o le tupe atoa mai le Medicaid e oo atu i le iva masina ma e telē le faasaoina mai ai o le Teritori.
Saunoa Aumua Amata, "O se tala fiafia lea mo Amerika Samoa, ma o le a telē le suiga mo le Teritori ma o taotu tagata. O le a ono avea lea pili ma tulafono i se taimi lata mai e fua i le sapaia e le mamalu lautele o le Peresetene ia Trump ma le manuia o le feutagaina i le va o ta'ita'i o le Maota ma le Senate. O le pili fou o loo aofia ai se vaega o tuutuuga na ou tusia mo le $18 miliona o le fesoasoani i meataumafa, faatasi ai ma le 100 pasene o tupe e totogi e le Medicaid mo le Malo o Amerika Samoa lea foi na ou talosagaina. O le a fesoasoani nei laasaga e lua i o tatou tagata i ni auala tāua e pei o meataumafa ma le tausiga o le soifuamaloloina, a o faamautu ai tulaga tau seleni a le Teritori. Ou te faafetai i le lagolagosua mai le toatele o Senatoa ma Sui o le Maota i le faafofoga mai a o o'u faailoa manaoga o o tatou tagata ma aafiaga o le Afa o Gita."
Finau le Tamaitaifaipule ia Amata i lana talosaga mo le $18 miliona i luma o le Maota ia May o le 2019
Ina ua mae'a le sivaloa a o feutaga'i mo se finagalo autasi ma se maliliega mai itu e lua, na maua se tofā i le vaiaso nei na mafua ai le palota a le Senate a o fai'ui'u le Aso Tofi. Ua faamoemoe e palota le Maota i le pili lava lea i le vaiaso o le Aso Faamanatu, o le a auina atu ai i le Peresetene i le amataga o Iuni ina ia sainia e avea ma tulafono. Ua mae'a ona faailoa faalauaitele e le afioga i le Peresetene ia Trump lona faamaonia o le nei taumafaiga ua malilie i ai.
Na tuuina atu e le Tamaitaifaipule ia Amata le tuutuuga mo le $18 miliona le aofai mo le fesoasoani i meataumafa (e $13 miliona e faaopoopo ai i le $5 miliona na ia maua i le pili i se toeteuteuga na talosaga muamua) i le masina nei o se toeteuteuga i le pili a le Maota e sii ai le fesoasoani i meataumafa mo Amerika Samoa ona o aafiaga o le Afa o Gita. Na pasia e le Maota le toeteuteuga a Amata i la lea taimi i se palota na faaleoina. Na taga'i le Senate i le talosaga a Amata i le vaiaso nei a o latou soalaupule ia autasi ai finagalo o le Maota ma le Senate ma maua se maliliega.
Na toe maua foi se tofā ina ua finagalo le Senate e talia le tele o fuafuaga a le Maota mo le Medicaid. E aofia ai le talosaga a Amata mo le 100 pasene e totogi e le Medicaid, lea na i totonu o le pili a le Maota mo le tausaga atoa 2019. Ua malilie le Senate i lea 100 pasene mo le iva masina.
E tele taimi na saunoa faalauaitele ai le Tamaitaifaipule ia Amata i le Konekeresi e uiga i le Afa o Gita ma le manaomia o lea alaga tupe, ma na manuia ana toeteuteuga e lua na tuuina atu ma faamaonia e le Maota. O lea taumafaiga e aofia ai lana molimau i luma o le Komiti o Tulafono a le Maota, ma lana lauga i luma o le Maota ia Me