Sainia e le Peresetene se Pili faaulu sa Suilagolago ai Amata e Fesoasoani ai i Vetereni

Laumua i Uosigitone—Ua talisapaia e le Tamaitaikonekeresi ia Aumua Amata i le vaiaso nei le sainia e le Peresetene ia Trump e avea ma tulafono se pili sa suilagolago ai le tamaitai e fesoasoani ai i Vetereni o loo aooga ua felavei a latou aoga ona o le ma'i pesi. O lea Pili faifaatasi a itufaaupufai e Tali i le Coronavirus Vetereni o loo Aooga i le 2020, H.R. 6322, na faauluina i le faaiuga o Mati i totonu o le Komiti a le Maota i Mataupu tau Vetereni ua avea nei o se tulafono. E maua e Vetereni o loo aooga e le gata i le taimi nei faapea pe a mae'a le COVID-19 o loo faatuai ai a latou fuafuaga faaleaoga se fesoasoani fou mai lea tulafono.

Image

O le nei ata o loo i ai le Tamaitaikonekeresi ia Amata i totonu o le Komiti ma le Taitaifono ia Takano ma le Sui Faailogaina ia Dr. Roe.

Saunoa Aumua Amata, o se Sui Faailogaina o le Komiti i Mataupu tau Vetereni "Ou te faafetai ona ua aofia i le futiafu e tasi ni manatu ma talosaga mai la matou Komiti i totonu o lea pili e mafai ai ona vave faataunuu. E faitau afe Vetereni o loo i totonu o porokalama tau aoaoga, ma ua tutaia a latou fuafuaga. O lea tulafono fou o le a mautinoa ai e le afaina lo latou agavaa poo se tulaga i totonu o se porokalama a o tapunia, ma e mafai ona toe faafou o a lava ni fesoasoani ma ni faamanuiaga na latou maua muamua e ala atu i a latou porokalama.

Saunoa le Tamaitaikonekeresi ia Amata "Na galulue faatasi le susuga i le Taitaifono ia Mark Takano ma le Sui Faailogaina ia Dr. Phil Roe e faatautaia lea taumafaiga i se ala e aufaatasi ai itufaaupufai auā manaoga o a tatou Vetereni o loo aooga. Tatou te mananao ia mafai e a tatou Vetereni o loo aooga ona faaauau a latou aoaoga mai le tulaga na gata ai."

Ua faafelavei aoaoga a Vetereni o loo aooga, ma ua faafuasei le feagai ma tau fou e totogi faapea faafitauli e le i manatu e o'o mai. Na pasia e le Konekeresi mai le uluai fesoasoani tau coronavirus se faiga e faatumau ai alauni faalemasina mo fale a Vetereni o loo aooga a o aga atu le faiga o a latou aoga e faaaoga fesootaiga i luga o le initaneti e aooga ai. Na faavae mai lea tulaga le Tulafono e Tali ai i le Coronavirus Vetereni o loo Aooga o le 2020, ma faaopoopo ai mataupu e tele na alia'e mai. Na talia ma sapaia faalauaitele nei iugafono e Faalapotopotoga e Tautua i Vetereni.

Image

Ata mai faamaumauga: O le Sui Faailogaina ia Amata i se feiloaiga i le Laumua i le 2019 e lagolagosua ai Vetereni o loo faatasi ai le Taitaifono ia Takano (o loo saunoa), le Sui Faailogaina ia Dr. Roe, ma isi Taitai Komiti.

O lea tulafono fou e mafai ai ona:

• Galue ma Aoga i taimi o Faalavelave faafuasei: O le a faaauau le totogia e le VA o tagata aoga vetereni o i totonu o porokalama e faigaluega ma aoga ai ua le toe maua a latou tulaga i totonu o le aoga talu le tapuniga.
• Faalautele Faasao mo Vetereni o loo aooga i taimi o Faalavelave faafuasei: E mafai e le VA ona totogia pea fale ma alauni i tagata aoga vetereni mo se taimi umi, faalautele ai aiaiga o loo i ai nei ia aofia ai tulaga uma o faalavelave faafuasei. E faatasi i masina uma e 6 (lalo mai le 12) e mafai ai ona faaaoga lea faasao ma ua maua ai vaiaso fou e fa e le tau totogia.
• So'o le fau ma le fau: O le afatausaga poo le vaitau aoga lea ua felavei o a latou penefiti aoga o le a toe faafoisia i tagata aoga ua le mafai ona faauma a latou vasega, o le a maua pea e vetereni aooga penefiti mo fale e o'o i le iuga o lea vaitau ma e le afaina ai lo latou agavaa i le GI Bill ona o ni vasega ua le ma'ea. O se fesoasoani lea i tagata aoga vetereni mo mea e totogi i aso taitasi ma faaauau pea e aunoa ma se afaina o penefiti e maua mo lea vaitau aoga atoa.
• Mautinoa e le Faasalaina Vetereni pe a o'o i tulaga o Faalavelave faafuasei: Faasaoina le agavaa o tagata aoga vetereni ma a latou tagata tausi ua aafia i le tapunia faafuasei o aoga.
• Tatala atu Faasao i Vetereni o loo i lalo o porokalama e Toefuataina ai Faatufugaga ma Galuega: Faamautinoa e tutusa le faasao mo nei porokalama e pei o isi tagata aoga i kolisi ma iunivesite o loo i ai puipuiga mo porokalama faatino e le mafai ona sui aga'i aoaoga e faaaoga ai fesootaiga i luga o le initaneti. E mafai e le VA ona totogi fale ma le tausiga e o'o atu i le faaiuga o le vaitau aoga, ma faaauau pea le agavaa o vetereni i tala atu o le taimi faatulagaina. O le faaopoopoga o masina e lua i alauni mo le tausiga i vetereni o loo i le Porokalama e Toefuataiina ai Faatufugaga ma Galuega i le taimi nei e totogi ai le faigata ona maua galuega ona ua faaitiitia galuega i le taimi o le pesi o le ma'i.

###