Sapaifaatasi e Amata Pili e Lua e Fesoasoani ai i Vetereni a Amerika Samoa ma le Pasefika na Aafia i le Agent Orange
Uosigitone, D.C. – Aso Tofi, Faailoa e le afioga i le Tamaitaifaipule ia Aumua Amata lona sapaia o ni pili eseese e lua o se taumafaiga faifaatasi a itu faaupufai e fesoasoani ai i Vetereni a le Pasefika na aafia i vailaau ma mea oona e aofia ai le Agent Orange.
O le afioga i le tamaitaifaipule ia Amata o ia lea o se tasi o sui mai le to'afa na ulua'i sapaiafaatasi, o se tasi o sui e toalua a le Ripapilikana ma sui e lua a le Temokarasi, le Tulafono Lonnie Kilpatrick Pacific Relief Act, H.R. 1713, o loo lagolagoina pea talu lona faauluina ia Mati e le afioga i le Faipule ia Michael San Nicholas o le itu Temokarasi mai Guam, faatasi ai ma le Faipule ia Amata o Amerika Samoa, le Faipule ia Gus Bilirakis o le itu Ripapilikana mai Florida ma le Faipule ia Frank Pallone, Jr. o le itu Temokalasi mai New Jersey. O le nei pili e faalautele ai le lisi o Teritori na tautua ai Vetereni sa ono aafia i le Agent Orange, ina ia aofia tonu ai Amerika Samoa, le atu Mariana i Matū, ma Guam. I lalo o le nei pili, o Vetereni uma na tautua i nei Teritori poo Johnston Atoll mai le 1962 aga'i ia Iulai 1980 o le a maua le fesoasoani i lalo o le Tulafono ua loa ona iai o le Agent Orange o le 1991 mo le aafia i vailaau oona.
Na sapaifaatasi foi e le tamaitaifaipule ia Amata le tulafono e faatatau I le Tausi ia Tatou Folafolaga (Keeping Our Promises Act), H.R. 2200, na faauluina i le masina nei e le Faipule ia Bruce Westerman o se Sui Ripapilikana mai Arkansas. O le nei foi pili e toe teuteu ma faalautele ai le tulafono Agent Orange o le 1991 e ala i le faalauteleina o le lisi o tulaga tau gasegase masalomia, e pei ona amanaia e le National Academy of Medicine, e aofia i le tulafono.
Saunoa le afioga Aumua Amata "ua o tatou iloa o Vetereni a le Pasefika i le Vaitau o le taua i Vietnam sa aafia i le Agent Orange ua iai aafiaga tumau o le soifuaga." E ao i le tulafono ona puipuia atoatoa tulaga na alia'e mai ona o le Agent Orange. O nei tulafono o le a fesoasoani ai i Vetereni latou te le o maua nei tautua, ae ua tatau mo i latou."
O se ripoti mai le Ofisa mo le Tofāmaopoopo i le Malō (Government Accountability Office) ua faamaonia ai nei aafiaga mai vailaau oona i totonu o vaega o motu i lea vaitaimi.
Faaauau le saunoaga a le Tamaitaifaipule ia Amata ma faapea "E manomano Vetereni o le Iunaite Setete o loo pāpā aao i motu o le Pasefika ma Amerika Samoa, e mitamita ai le agaga i le maualuga o le faitauaofa'i o ō tatou tagata e ulufale atu i vaegaau a le malō. E mafai e lo tatou malō e ala i nei taumafaiga ona faatumau le gaua'i atu i Vetereni ma amanaia le matautia ma aafiaga tumau e ono lamatia ai le soifua maloloina a o feagai latou ma le tautua."
Tamaitaifaipule ia Amata ma le Failautusi o le VA o Wilkie i se fonotaga i le 2019.