Saunoaga a Amata i le Faaiuga e uiga i le Sitiseni

Laumua i Uosigitone – Aso Faraile, O se faasalalauga lea mai le Tamaitaikonekeresi ia Aumua Amata:

"Ua tatou lagona le faanoanoa i le taofi a le faamasinoga feterale mai Utah i le mataupu a Fitisemanu. O le a faate'ia ai le sefulu o afe o tagata Amerika Samoa ona ua faia e se faamasino feterale mai Utah se faaiuga ua avea ai nei i latou ma sitiseni o le Iunaite Setete. O lea faaiuga e le taliaina ma e le talafeagai ona o loo ola taualumaga faatemokalasi a tagata Amerika Samoa o loo alala i Amerika Samoa ma o loo ua i ai se auala e mafai ai ona avea se tasi ma sitiseni sa ou galue ai ina ia faafaigofie. O lea faaiuga a le faamasino feterale mai Utah e aunoa ma se taiala. Ua taunuu ai i se faaiuga e tuufeagai pe a faatusa i iuga a faamasino iloga a le Faamasinoga mo Apili a le Iunaite Setete i le Itumalō o Columbia. O le itu e le manuia ai, e le o aofia i lea faaiuga o tatou popolega na faaali e uiga i aiā tatau o tagata Amerika Samoa latou te filifili ai lava ta'ito'atasi ma aufaatasi se faigamalō latou te finagalo ai."

"Ou te faatuatua i le Atua i measili ua ia manatu ai mo tagata Samoa ma o le a na faia ia taunuu mea uma ma le manuia. E ui o loo i ai le avanoa mo tagata Amerika Samoa e ese ai o latou taofi pe talosaga e avea ma sitiseni a le Iunaite Setete, e i ai itu e matuā popole ai i le faia mai e se faamasino feterale mai se nofoaga mamao faaiuga i nei mataupu. O le aganuu a tagata Amerika Samoa e aupitosili ona matua i totonu o motu o le Pasefika, , ma o se vaega tāua o loo fesoota'i ai tu ma aga faapitoa o loo olaola i le faaSamoa, le faatautaiga o ona fanua ma pulega a matai na tuufaasolo mai augatupulaga e fia. E ia i tatou le agaga ina ia faasao a tatou tu ma aga faaSamoa, ma e i ai le faamoemoe tatou te apili lea faaiuga, a o tatou galulue ina ia mautinoa o loo i ai se auala mo tagata taitoatasi e avea ai ma sitiseni ma e faigofie ona maua e tagata Amerika Samoa uma ua finagalo e talosaga. O le a ou faailoa atu auā le silafia o nai o tatou tagata i soo ala ou te mafaia ma avea pea ma o'u ta'iala finagalo o le mamalu o loo fai a'u ma o latou sui mai Amerika Samoa a o galulue ai ma le afioga i le Kovana ia Lolo Moliga ma le afioga i le Loia Sili ia Talauega Eleasalo Ale."

# # #