Sula e Amata le Pasia e le Maota o Seleni e Puipui ai Totogi
Laumua i Uosigitone – Aso Tofi, Na faafetaia e le Tamaitaikonekeresi ia Aumua Amata le pasia aufaatasi e itufaaupufai o le $484 piliona o le Pili mo le Porokalama e Puipui ai Totogi ma le Faaleleia o Tausiga Faasoifuamaloloina, lea e toe faafoisia ai seleni mo le Porokalama e Puipui ai Totogi e fesoasoani i pisinisi laiti.
O le laasaga mulimuli lea i le faiga o tulafono ma ua auina atu nei le pili i le Peresetene ia Trump ina ia sainia e avea ma tulafono. O le nei pili ua faamoemoe e toe tului ai le $321 piliona i le Porokalama e Puipui ai Totogi e fesoasoani i pisinisi laiti, ma e $60 piliona ua avanoa e na o faiaitalafu (lenders) ma iuni e nono ai tupe (credit unions) laiti e ala atu ai, o se tasi o ni faaleleiga mai le tele ua faia ia mautinoa o nei seleni ua tufaina faalauaitele e o'o atu i pisini laiti ma vaega o tagata e le lava le tautua ua tuuina atu mo i latou.
E telē se fesoasoani fou mai lea pili mo falemai, e $75 piliona ma le $25 piliona mo porokalama tau suesuega e ala atu i le Matagaluega o Tautua mo Tagata ma lo latou Soifuamaloloina.
Saunoa Aumua Amata "E lagona lo'u fiafia tele o le a toe maua foi lea fesoasoani i se taimi lata mai e Puipui ai Totogi auā a tatou pisinisi faalotoifale ma falefaigaluega. Ua faamoemoe le Konekeresi i lea seleni e faatumau ai pisinisi laiti a o feagai ma le faafuasei o nei pagatia faaletamaoaiga, ma ua aapa atu i le Taupulega mo Pisinisi Laiti (SBA) ina ia mautinoa e maua e a tatou pisinisi laiti lea fesoasoani.
Na faaiu le saunoaga a Amata "Ua uma ona faatulaga e le Konekeresi se $2.8 tiliona i totonu o pili e fa ina ia faaaoga i taumafaiga e tetee atu ai i le coronavirus ma fesoasoani i le tamaoaiga. E faaauau pea lo'u faailoa atu mo lou silafia faaiuga i totonu o Uosigitone o loo aafia ai o tatou motu."
###