Tali Amata i le Fesiligia e le afioga i le Peresetene ia Biden i Mataupu tau Konekeresi

Laumua i Uosigitone – Aso Tofi, Na tusi atu le Tamaitaikonekeresi ia Uifaatali Amata i le afioga i le Peresetene ia Biden e uiga i mataupu tau konekeresi e sili ona taua mo Amerika Samoa, e faailoa atu ai ia te ia tulaga manaomia mo le faafoi o tagata, ma faataotoina ai le anoano o avanoa e galulue ai mo se manuia faatasi ma lana Taupulega i se ala e au faatasi ai itufaaupufai i vaiaso, masina ma tausaga a sau.

Na saunoa Amata i le afioga i le Peresetene "Ua 10 masina o aunoa i matou ma ni vaalele la'u pasese ma o lea faatoa amata le faafoi o le faitau selau o o matou tagatanuu na mau i Amerika o loo taumafai e foi i aiga. E matua talia ma le agaga faafetai soo se fesoasoani faaopoopo e te faia mo i latou a o faanofoeseina i Hawaii e ui atu ai mo Amerika Samoa. E talia fiafia lou faaopoopo o seleni mo faigamalo a teritori faatasi ma vaega o fesoasoani mo setete i totonu o lau talosaga e fesoasoani ai ia matou i le nei vaitau o le faaletonu o le tamaoaiga ua mafua ona o le ma'i pesi."

O itu autu nei o loo faamamafa i lana tusi:

• faaauau fesoasoani tau Covid e pei o tui puipuia, faafoi o tagatanuu ma fesoasoani tau tamaoaiga;
• o lana pili faaulu o loo aufaatasi ai itufaaupufai e aveese tapulaa o le Medicaid ia tutusa ai ma Setete;
• talosagaina le sii mo tulaga manaomia e le Maotagasegase o le LBJ;
• faafouina mo ni tausaga o le Seleni maua mo le Atinaega o le Tamaoaiga o Amerika Samoa, ma nisi fesoasoani mo le tamaoaiga faalotoifale ma aoga;
• lagolago mo le puipuia o aau amu ma tali atu i aafiaga o le tau mo lana pili ua aufaatasi ai itufaaupufai e toe faataga ai porokalama autu e Faasao ai Aau Amu.

Na faaiu lana saunoaga i le faafetai ua mae'a ona fesootai atu o ia e le vaega a le Peresetene, ma ua faamoemoe o le a latou galulue ma lana Matagaluega o Initeria, vaega a le Maota Pa'epa'e e gafa ma mataupu tau konekeresi mo atu motu, ma isi matagaluega.

O le tusi atoa lenei:

Talofa i lau afioga i le Peresetene!

E faafetai atu i lau tofa saili mai i lo'u ofisa i le Konekeresi e ala i lau vaega o loo gafa ma Mataupu tau Konekeresi e fesiligia ai nisi o itu e tatau ai le faamuamua a Amerika Samoa a o usuia le uluai feiloaiga a le nofoaiga fou lona 117 a le Konekeresi. O le avea o a'u ma sui o le Konekeresi mo Amerika Samoa, ua ou faamoemoe e galue faatasi mo se manuia atoa ma lau Taupulega i se ala e faatasi ai itufaaupufai i vaiaso, masina ma tausaga a sau.

Fesoasoani tau COVID-19 mo Teritori

E sili ona taua i lo tatou soifua faalemafaufau, faaletino ma faaletamaoaiga faapea le agai i luma ma le manuia lautele le faafoisia mai le pagatia ona o le COVID-19 ma le soifua maloloina o o matou tagata i Amerika Samoa ma le atunuu atoa. O le pogai lea ou te momoli ai le faamalo i au taumafaiga ua e ave ai le mua e faataalise ai ona tufa atu o vailaau puipuia i setete ma teritori.

Na avea ma lu'i tele le ma'i pesi o le COVID-19 i le tausaga ua tuanai mo i tatou uma i le lalolagi atoa ae maise i tatou o i nofoaga e tu motu ese pei o Amerika Samoa e 7000 maila le mamao mai le Laumua i Uosigitone. Sa leai ni vaalele la'u pasese mo i tatou i le 10 masina ma o lea faatoa amata le faafoi o le faitau selau o tatou tagatanuu sa mau i Amerika o loo taumafai e foi i aiga. O le a matua talia soo se fesoasoani faaopoopo e mafai ona e tuuina atu mo i latou a o faanofoeseina i Hawaii ina seia foi atu i Amerika Samoa. E talia fiafia lou faaopoopo o seleni mo faigamalo a teritori faatasi ma vaega o fesoasoani mo setete i totonu o lau talosaga e fesoasoani ai ia matou i le nei vaitau o le faaletonu o le tamaoaiga ua mafua ona o le ma'i pesi."

Aveese Tapulaa o le Medicaid

E aupito sili ona taua mo Amerika Samoa le soifua maloloina ma le manuia o o matou tagata, ma ou te talitonu e onomea mo teritori uma le faaauau atoa ma le sii o seleni e faatupe ai le Medicaid mo teritori faapei ona faia i Setete.

Ou te talosaga atu i lau taupulega e lagolago le pili ua autasi ai itufaaupufai na faauluina e la'u vasega o sui mai teritori ma a'u, o le Pili e maua ai e Atu Motu faiga tutusa mo le Medicaid, o le a aveese ai tapulaa e le toe faaaogaina ma muta ai le faatapulaa o seleni Medicaid mo teritori. O loo o matou saili pea ala eseese ma atina'e lo matou tamaoaiga ma e manaomia le lagolagosua atoa o lea fesoasoani autu mo matou tagata—o loo tu mamao, motu ese ma pagatia mai le maualuga o le tau o le soifuaga ona o le fita o faatautaiga i fuafuaga a o matou motu. O lea pili na matou toe faauluina ma la'u vasega o sui mai teritori i le masina nei o le a maua ai lea faiga tutusa. Ou te talosaga atu ma le loto maulalo mo lau fesoasoani i lea porokalama e sili lona taua ina ia faalauteleina ia aofia ai lo matou teritori e aunoa ma tapulaa e pei ona i ai i le tuanai.

I le ma lea, e matua taua le faafou o la matou Falema'i e tasi o le LBJ ma e manaomia le tele o se faaopoopoga o seleni mai le feterale ina ia lavataoso e tali atu i le ma'i pesi atoa ma tulaga e manaomia e o matou tagata ona e afaina gofie i faalavelave faafuasei. Ona o le itu lea, ou te talosaga atu ai mo lau tupe faaagaga mo le Ofisa o Mataupu tau Atu Motu i totonu o le Matagaluega o Initeria ia maua ai se sii tele mo mea e manaomia e le falema'i LBJ a o feutagai ma le Taupulega a la matou Kovana fou, le afioga Lemanu Peleti Mauga.

Atina'e le Tamaoaiga ma Aoga

E manaomia le tatala atu mo ni tausaga se tele ae le na o le tasi le maua o le Seleni mo le Atinaega o le Tamaoaiga o Amerika Samoa / Vaega 30a o seleni maua i lafoga ina ia mafai ai e matou ona tosina mai pisinisi e tele ma pisinisi eseese ma galuega tau tamaoaiga e maualuga atu totogi. O le tatalaina mo ni tausaga o lea seleni e maua ai galuega ua pau lea o le ala e tosina ai isi pisinisi e faaalu a latou tupe ma le faamoemoe o le a tupu e maua ai galuega i se nofoaga e tu motu ese e pei o matou.

E le gata i lea tupe maua mai lafoga, ou te talosaga atu foi i se fesoasoani mai lau taupulega e atina'e tekonolosi fou ma faatulaga ala o fesootaiga. E aoga i lo matou teritori e tu motu ese le fesootaiga fou o le 5G ia mafai ai e a matou tagata aoga i aoga maualuga ma le kolisi tuufaatasi ona o gatusa ma suiga o le lalolagi tele vave. O tekonolosi fou ma seleni fesoasoani mo aoga o faavae autu ia e atina'e ai lo matou tamaoaiga i le aga'i i luma.

Puipuiga mai aafiaga o le Tau ma le faasaoina o Aau Amu

I le ma le vaega mulimuli, e ao ona tatou faasao lo tatou paneta ma la matou aganuu Samoa o loo i ai i totonu ma e tatalo atu ina ia e lagolagoina la'u pili e puipui ai aau amu lea na ou faaulu talu ai nei ma nisi o vaega o sui. Na faalauiloa talu ai nei e le NOAA se faamaumauga maoa'e i aau amu i totonu o sami o Amerika Samoa, ma o se pili ua au faatasi ai itufaaupufai, H.R. 160, e toe faataga ai le Tulafono o le tausaga 2000 e Faasao ai Aau Amu ma faavae ai le Vaega Tautua a le Iunaite Setete mo Aau Amu, sa faauluina i le amataga o le masina nei. O le avea ma se tasi o ulua'i sui lagolago mo lea pili, ou te talosagaina lou lagolagosua mo nei faasao i a matou aau amu ma le siomaga.

Upu Faai'u

Ou te toe faafetai atu i lau afioga i le Peresetene Biden i le vave o le tofa saili a lau taupulega ma le fesootai mai o lo'u ofisa faapea lou finagalo e soalaupule i se ala e autasi ai itufaaupufai mo le manuia o tagata uma. Ua ou faaamoemoe e tautua soosootauau ma lau faigamalo, le vaega o mataupu tau atu motu a le konekeresi o loo i le Maota Pa'epa'e, le Matagaluega o Initeria ma isi matagaluega a o e tu i le foe. Faamanuia le Atua i ou faiva uma mo Amerika ma Amerika Samoa.

Aumua Amata Coleman Radewagen

Sui o le Konekeresi