Talia e Amata le $1.2 Miliona o Seleni tau Sunami e ala mai le FEMA mo le ASPA
Laumua i Uosigitone – Aso Lua, Ua talia fiafia e le Tamaitaikonekeresi ia Aumua Amata le maua o seleni mo le Pulega a le Vai ma le Uila a Amerika Samoa poo le ASPA e sili atu i le $1.2 miliona e ala atu i le Matagaluega a le Feterale e Gafa ma Faalavelave faafuasei poo le FEMA, o se vaega o le Matagaluega e Puipuia le Lotoifale a le Iunaite Setete.
O lea faailoga ua maua ai le $1,200,749.98 i tupe mai le feterale mo galuega toe faaleleia ona o le faaleagaina o le Fale Faigaluega i Satala mai mea na leaga i le sunami o le 2009 (FEMA-DR-1859-AS Earthquake, Tsunami, and Flooding https://www.fema.gov/disaster/1859.)
O le Tamaitaikonekeresi ia Aumua Amata a o i ai i le Ofisa Autu o Galuega lea e faaigoa ia Utu Abe Malae
Saunoa Aumua Amata "E le galo i a tatou le sunami maoa'e o le 2009. Ua pogai i lea mala faanatura malosi le maumau o soifua i le tele o aiga i totonu o o tatou motu."
Faaauau le saunoaga a le tamaitai "E faafetai atu i le sui Failautusi o le DHS ia Chad Wolf ma le Pule o le FEMA ia Peter Gaynor mo le lagolagosua i lea galuega. E faamalo atu i le Kovana ia Lolo Moliga, susuga i Faatonu, Taitaifono ia Fonoti Perelini, ma lē o loo avea nei ma Faatonu Sili le susuga aWallon Young."
O le Tamaitaikonekeresi ia Amata ma nisi o le aufaigaluega a le ASPA
O lea seleni ua maua e ala mai le pule i lalo o le Vaega 406 a le Tulafono Robert T. Stafford e Fesoasoani pe a tupu ni Mala ma Faalavelave faafuasei, lea e ala mai ai le faatulagaina e le Konekeresi o faasologa faalauaitele mo fesoasoani a le feterale i setete ma teritori.
O le Tamaitaikonekeresi ia Amata ma lē o loo fai nei ma Faatonu Sili o le ASPA le susuga aWallon Young
O le DHS/FEMA e faatonuina seleni mo lea galuega e ala atu i le Malo o Amerika Samoa, lea o loo tofia e faamautinoa le maua e le vaega ua agavaa e talia seleni lea faailoga. O le $1.2 miliona o se seleni e faatupe e le feterale le 90 pasene mai lana vaega. A mae'a le faasologa o iloiloga a Amerika Samoa ma tauaaoina mai faamaumauga, e tuuina atu e i latou seleni i vaega e taliaina i se faiga e toe totogi ai tupe sa faaaoga.
O le suaina o le fanua mo atina'e i le lumanai i le aso na ofoina atu ai le Ofisa Autū mo Galuega lea ua faaigoa ia Utu Abe Malae
O le ASPA o se vaega tautua a le atunuu e taula'i i atina'e lea o loo tuuina atu tautua tau eletise, suavai, suavai lafoa'i ma otaota faatasi ma le matafaioi mo atina'e e tautua ai le atunuu o Amerika Samoa.
###