Talia e Amata le Amata i le Aso Gafua o le Porokalama e Puipui ai Totogi
Laumua i Uosigitone – Aso Toanai, Ua faamanatu e le Tamaitaikonekeresi ia Aumua Amata i pisinisi laiti ma falefaigaluega e toe amata i le Aso Gafua le Porokalama e Puipui ai Totogi. O le aoauli o le Aso Faraile na sainia ai e le Peresetene ia Trump le $484 piliona o le Pili mo le Porokalama e Puipui ai Totogi ma le Faaleleia o Tausiga Faasoifuamaloloina, lea na pasia e le Maota i le faaiuga o le Aso Tofi i se palota e 388-5 na matua fulisia ai itufaaupufai e lua.
O le a toe faatumu ma toe faaleleia ai le Porokalama e Puipui ai Totogi, o se galuega faifaatasi a le Taupulega o Pisinisi Laiti ma le Matagaluega o Tupe a le Iunaite Setete lea na uluai faatulaga e ala i le Pili CARES ia Mati 27. O lea porokalama ua toe faatupeina atoa i le $321 piliona mo fesoasoani i pisinisi laiti, ma e $60 piliona e avanoa i na o faiaitalafu ma iuni e nono ai tupe laiti ua mafai ona ala atu ai. O le faamoemoe o le Konekeresi ina ia avanoa faalauaitele nei seleni mo pisinisi laiti ma vaega o tagata e le o lava tautua o loo maua e i latou. O nisi o faalapotopotoga tetele na manuia mai le uluai vaega o nonoga tupe ua latou toe faafoisia lea tupe agai i seleni ma ua toe avanoa ai auā pisinisi laiti.
Saunoa Aumua Amata, "E amata atu i le Aso Gafua ua mafai ona toe talanoa falefaigaluega i faiaitalafu e uiga i lea porokalama. Na faatulaga e le Konekeresi lea tupe ia gafatia ai e pisinisi laiti ona tumau a o feagai ma le ogaoga o le faaletonu tau tamaoaiga ua mafua i le ma'i pesi, ma sa matou galulue ma le SBA ina ia avanoa faalauaitele lea fesoasoani. Ou te fia faafetai i le Pule o le SBA ia Jovita Carranza ma le Failautusi o Tupe ia Steven Mnuchin ma a latou aufaigaluega uma i le tuufaatasiga o lea porokalama tele i se taimi puupuu."
Tamaitaikonekeresi ia Amata a o palota le Komiti o Pisinisi Laiti i le amataga o le tausaga 2020
E $100 piliona tala ua i ai i le tulafono fou mo tausiga faasoifuamaloloina, e faaopoopo i pili na i ai muamua e tali atu ai i le coronavirus, e aofia ai le $75 piliona e fesoasoani mo tautua i falemai, ma le $25 piliona e faaauau ai le faalautelega ma faaleleiga o porokalama mo suesuega e ala atu i le Matagaluega o Tautua mo Tagata ma le Soifuamaloloina.
E tusa ma le $2.8 tiliona le aofaiga na faatulaga e le Konekeresi i totonu o pili e fa, ua faamauina e le pili iloga o le CARES, e tali atu ai i le coronavirus, faamautinoa ai tausiga faafalemai ma tuuina atu fesoasoani i le tamaoaiga, e aofia ai totogi mo e le faigaluega, siaki fesoasoani i tagata taitoatasi, fesoasoani tau Medicaid, ma feasoasoani i pisinisi ma malo faalotoifale.
Tagai ane i le: sba.gov/paycheckprotection mo nisi faamatalaga e uiga i le Porokalama e Puipui ai Totogi.
###