Talia e Amata le Malelega a le Afioga i le Peresetene e uiga i le Faamalosi au i le Tamaoaiga mo tagata Amerika mai Asia ma le Pasefika
Uosigitone, D.C. – Aso Gafua, Na auai le Tamaitaifaipule ia Aumua Amata faatasi ma le afioga i le Peresetene ia Trump, le Failautusi o Femalagaina ia Elaine Chao, le Failatusi o Fefaatauaiga ia Wilbur Ross ma isi taitai i le Maota Pa'epa'e mo le sainia o le Malelega a le afioga i le Peresetene e faatatau i le uunaia o le faamalosi au i le tamaoaiga o tagata Amerika mai Asia ma le Pasefika.
Saunoa Aumua Amata, "O se Malelega tāua ma le talia lelei lenei mo a tatou tagata Asia ma le Pasefika o loo alala i itu e fia o le atunuu. Faafetai i lau afioga i le Peresetene Trump mo le nei Malelega ma le taumafaiga faifaatasi e fesoasoani i le tupu ma le atinaega o le tamaoaiga o tagata Amerika ua fai ma o latou tofi Asia ma le Pasefika, o se vaega o se tofā manino mo galuega ma avanoa mo tagata Amerika uma."
Faatasi atu le Tamaitaifaipule ia Amata ma le Peresetene ia Trump ma le au mautofi i totonu o le Ofisa o le Peresetene a o ia sainia le Malelega
O le nei Malelega na saunoa ai le Peresetene ia Trump: " E tāua le sao o tagata Amerika mai Asia ma le Pasefika i le faasaienisi ma le tekonolosi, aganuu ma faatufuga, ma matata e pei o pisinisi, faaletulafono, faafoma'i, a'oa'oga, faapolokiki ma le tamaoaiga. O lo latou oloolopitovaa ma matupalapa to ua avea ma faalaeiau, itu tāua ma faamanatuga i le soifuaga faa-Amerika.
Taga'i atu Aumua Amata a o sainia e le Peresetene ia Trump le Malelega e faatatau i le Faamalosiau i le Tamaoaiga o Tagata Amerika mai Asia ma le Pasefika (White House photo)
O loo faamauina i lea Malelega (e maua lona atoaga i nei) le vave o le tupu o le faitauaofai o tagata Amerika mai Asia ma le Pasefika ma i se fua faatatau e i ai le faamoemoe e o'o atu i le 2060 ua o'o le aofai o tagata Amerika e tupuga mai Asia ma le Pasefika i le 40 miliona, po o le 9 pasene o le atunuu. Na faia le faasalalauga e le afioga i le Peresetene i se sauniga na sainia ai le Malelega i le Ofisa o le Peresetene. Sa faatasi ma le afioga i le Peresetene i latou na ia faailoa o le a avea ma totino o le Komisi Fautua a le Peresetene i tagata Amerika mai Asia ma le Pasefika, e aofia ai Aumua Amata, pau lava lea o le tagata Pasefika o loo i le Komisi e aumau i atu motu.
E le gata i nisi o faatinoga, o le nei Malelega ua faavae ai le Komisi Fautua a le Peresetene i tagata Amerika mai Asia ma le Pasefika faapea Fuafuaga faavae a le Maota Pa'epa'e mo tagata Amerika mai Asia ma le Pasefika. O le Komisi o se vaega o ni fautua, ua loa o loo galulue ma tagata Amerika mai Asia ma le Pasefika, ae o le Fuafuaga faavae o ni matagaluega feterale o loo galulue soosootauau o loo i ai le sao mai matagaluega eseese o le taupulega a le afioga a le Peresetene ia Trump ma e autū tonu i tagata Amerika mai Asia ma le Pasefika. Ua faavae le Komisi i totonu o le Matagaluega o Fefaatauaiga a le Iunaite Setete e faatāua ai le faamalosiau i taumafaiga mo le tamaoaiga.