Talia e Amata le maua o Tupe mo Amerika Samoa e fai ai Suesuega i auala e faalelei ai fesootaiga
Uosigitone, DC – Aso Gafua, Talia e le Tamaitaifaipule ia Aumua Amata tupe mai le feterale e ala mai le Matagaluega o Fefaatauaiga a le Iunaite Setete ma le Taupulega mo le Atinaega o le Tamaoaiga (EDA) mo se suesuega i auala e faalelei ai fesootaiga i Amerika Samoa ina ia fesoasoani i le faatulagaina o le atinae mo le tamaoaiga.
Saunoa Aumua Amata, "E telē le sao o le mafai e auala o fesootaiga ona fai mo pisinisi laiti ma maua ai galuega. O le a manuia le lumana'i o le tamaoaiga o Amerika Samoa pe tupu vaega o auala o fesootaiga ma mafai ona faaaoga tekonolosi, ou te talia ai le nei suesuega ua talafeagai lona taimi."
Tamaitaifaipule ia Amata ma le Failautusi o Fefaatauaiga ia Wilbur Ross
Ua atofa e le Taupulega mo le Atinaega o le Tamaoaiga le $100,000 e ala mai le Matagaluega o Fefaatauaiga a Amerika Samoa e faatupe ai se suesuega i auala o fesootaiga e fausia ai le faatulagaina, faatupu ma atina'e pisinisi i totonu o Amerika Samoa e faavae i faamaumauga mautū.
A mae'a le nei suesuega, o le a mafai ai e le Teritori ona faaaoga avanoa o loo alia'e mai i pisinisi tau fesootaiga, e tupu ai pisinisi ma maua ai galuega ma mafai ona faamautū. O lea suesuega o le a fai ma taiala mo se faavae i le atinaega o le tamaoaiga, faagasologa ma ala e iloa ai tulaga o le maketi, tupe faaalu ma taunuuga e faamoemoe o le a o'o i ai.
Saunoa le Tamaitaifaipule ia Amata, "Ou te fia faafetai faapitoa i le susuga i le Faitonu mo le Teritori ia Michael McDonald ma ave le faamalo i le Faatonu o le Matagaluega o Fefaatauaiga a Amerika Samoa, le susuga a Keniseli Lafaele. Faafetai foi i le susuga i le Failautusi o Fefaatauaiga ia Wilbur Ross ma le taitaiga a le Taupulega o le Atinaega o le Tamaoaiga (EDA) mo le amanaia o lea tulaga manaomia mo Amerika Samoa, e aofia ai le susuga Dr. John Fleming, o le Sui Failautusi mo le Atinaega o le Tamaoaiga."