Talia e Amata le silia i le $2.3 Miliona o tupe maua mo le Soifuamaloloina
Uosigitone, D.C. – Aso Gafua, Na talia e le Tamaitaikonekeresi ia Aumua Amata tupe feterale i le aofa'i e $2,327,753 mai le Matagaluega o Tautua mo le Soifuamaloloina ma Tagata a le Iunaite Setete mo le Matagaluega o le Soifuamaloloina a Amerika Samoa. O nei tupe mo le Pasefika o loo auina atu i lalo o le Porokalama mo le Soifuamaloloina a le Taupulega mo Alamanuia mo le Soifuamaloloina ma Tautua (HRSA).
Saunoa Aumua Amata "O tupe nei mai le HRSA e fesoasoani tele a o taumafai foma'i ma tagata faapitoa a le tatou Teritori e foia gasegase o tagata o Amerika Samoa. O tautua mo le Soifuamaloloina o se tasi lea o itu e sili ona tāua mo tupe feterale ina ia faia ai se suiga."
Tamaitaikonekeresi ia Aumua Amata male Faatonu o le Matagaluega o le Soifuamaloloina ia Motusa Nua
Saunoa Amata, "E faafetai faapitoa i le Faatonu ia Motusa Nua ma Elisapeta Ponausuia mo a latou taumafaiga ina ia maua mai nei tupe. Ou te faafetai foi i le susuga i le Failautusi o le HHS ia Alex Azar ma le susuga ia George Sigounas o le HRSA mo le la sao o loo maua ai pea avanoa mo tautua faasoifuamaloloina."
O loo tuuina atu e le HRSA tautua faasoifuamaloloina i nofoaga e tu motuese e pei o Amerika Samoa. O loo galue le matagaluega e faaleleia le auina atu o tausiga faasoifuamalolona i nei nofoaga, ma i latou o e ono afaina ona o tulaga faaletonu i le tamaoaiga poo tautua faafalema'i. E lata i le 90 pasene o le paketi a le HRSA o loo auina atu i tupe maua ma maliliega faafeutaga'ina.
###