Talia e Amata le silia i le $400,000 o tupe mai le Tulafono CARES e fesoasoani mo Suega o le Vairusi

Laumua i Uosigitone – Aso Faraile, Ua talisapai e le Tamaitaikonekeresi ia Aumua Amata le $406,084 o seleni mai le Tulafono CARES e faalautele ai le mafai e Amerika Samoa ona faatino suega o le COVID-19. O lea seleni tuufaitalia e mai le Pulega o Alamanuia ma Tautua tau Soifuamaloloina (o le HRSA lona faapuupuuga i le faaperetania), o se vaega o le Matagaluega o Tautua mo Tagata ma lo latou Soifuamaloloina (o le HHS lona faapuupuuga i le faaperetania).

Saunoa Aumua Amata "O loo faaauau pea le maua mai o nei alamanuia aoga mai le Tulafono CARES. Ua manuia i tatou ona e leai se tasi ua maua i le coronavirus, ma e tāua pea le lava tapena ma mafai ona faatino suega e pei ona manaomia."

O lea tupe o loo ala atu i le Matagaluega o le Soifuamaloloina a Amerika Samoa, lea e ta'ita'i e le Faatonu ia Motusa Nua, ma o loo faatautaia lea taumafaiga e Kenn Kuaea, o le faatonu sili o Faletalavai Faaitumalo.

Image

O le Tamaitaikonekeresi ia Aumua Amata ma le Faatonu o le Soifuamaloloina ia Motusa Nua

Saunoa le Tamaitaikonekeresi ia Amata "E faafetai atu ia Kenn Kuaea i lona sao i le nei taumafaiga, ma e faamalo atu i le Kovana ia Lolo Moliga ma le Faatonu ia Motusa Nua a o faaauau tapenaga a le Teritori. Tatou te faafetai i lea fesoasoani mai le HHS ma le HRSA. Ae maualuga lava lo tatou faamoemoe i a tatou foma'i ma tagata tausi ma'i i le nei taumafaiga."

O le HRSA o loo ta'ita'i e le Pule ia Thomas Engels o se vaega o le Taupulega a Trump, ma o le HHS o loo ta'ita'i e le Failautusi ia Alex Azar.

###