Talisapai e Amata le $2 Miliona o Seleni mai le EPA mo le ASEPA

Laumua i Uosigitone – Aso Gafua, Ua talisapai e le Tamaitaikonekeresi ia Aumua Amata se seleni mai le Matagaluega e Puipuia le Siosiomaga e $1,976,100 le aofai mo le Matagaluega e Puipuia le Siosiomaga a Amerika Samoa (faapuupuuina i le faaperetania o le ASEPA).

Saunoa Aumua Amata "E faafetai atu ia Fa'amao Asalele tainane le ASEPA e tusa o lea faasilasilaga i le seleni ua maua. E aoga nei seleni mai le feterale mo taumafaiga faalotoifale e faasao ai le suavai taumafa ma nisi tulaga faatāuaina tau soifuamaloloina. Faafetai atu ia te i latou uma i le ASEPA o loo galulue i nei taumafaiga."

O lea faailoga o seleni mai le feterale mo le Porokalama Tuufaatasi e Puipui ai le Siosiomaga a le EPA a Amerika Samoa. E aofia i lea porokalama le matafaioi mo le suavai taumafa, mataituina o le tulaga o le vai a le teritori ma ona matafaga, vaaiga o futiafu (watershed), atinaega o porokalama mo nofoaga ua afaina ona o atinae i le tuana'i ma le faamamaina, tulaga manaomia i vailaau e tinei ai mea fetolofi felelei ma meaola e lamatia ai laau totō ma manu, a'oa'oga tau siosiomaga ma faasoa i alalafaga, ma le vaaiga o tulaga mamā o le ea.

O nei seleni o se vaega o le galuega fuafua mo ni tausaga i le aofai e $12,682,100.

###