Talisapai e Amata le $266,229 o Seleni mai le HUD e ala mai le porokalama CDBG
Laumua i Uosigitone – Aso Lulu, Ua talia e le Tamaitaikonekeresi o Aumua Amata se seleni o le Tulafono CARES mai le Matagaluega o Atinae e Faalelei ai Fale ma nofoaga i le Taulaga poo le HUD, e $266,229 e ala atu i le porokalama o vaega o seleni (block grant) e atinae ai atunuu poo le CDBG.
O le HUD lea o loo taitai e le Failautusi ia Dr. Ben Carson o le uluai matagaluega lea a le feterale na faalauiloa seleni mai le Tulafono CARES i totonu o Amerika Samoa i le faato'ā mae'a ona avea ma tulafono lea pili faaulu iloga ia Mati 27, na tatala mai ai le silia i le $801,685 i seleni fesoasoani tau coronavirus e lua i lea taimi.
Saunoa Aumua Amata "Ua tele auala o loo fesoasoani ai seleni a le feterale mai le Tulafono CARES ia Amerika Samoa a o feagai o tatou motu ma tulaga ua o'o ai le tamaoaiga ona o le ma'i pesi. E faafetai atu i le Peresetene ia Trump ma Dr. Carson i le faaauau o le fesoasoani e ala mai lea seleni ua faamoemoeina."
O le Tamaitaikonekeresi ia Amata ma le Failautusi ia Dr. Carson i se faatasiga i le Maota Pa'epa'e (file photo)
O seleni nei mai le HUD e fesoasoani i le soifuamaloloina o tagata lautele, tali atu ai i le coronavirus, ma tulaga manaomia i faaletonu o fale ma le tamaoaiga.
Na maua mai le Tulafono CARES se sii maoae i seleni mo le porokalama CDBG i le atunuu aoao e puipui ai, tapena ma tali atu i le coronavirus. O le nei seleni e mai le vaega lona lua o le taumafaiga lena, ma o nei seleni o le a atofaina i setete ma malo o atu motu ia Me 11.
E le gata i seleni ma tupe mo le malo o Amerika Samoa, e i ai foi fesoasoani tau feterale mo tagata taitoatasi o le a o'o mai mo tagata taitoatasi ma aiga i totonu o Amerika Samoa ona o le Tulafono CARES, e aofia ai i latou o le a maua siaki fesoasoani, lea e ta'ua foi o le stimulus, faatasi ai ma i latou o loo talosaga e ala atu i le malo o Amerika Samoa mo fesoasoani ona ua le toe faigaluega lea e totogi e le Tulafono CARES ma tufaina e le Teritori.
###