Talisapai e Amata le Pili o loo aofia ai le si’i o totogi a Vaega au, faiga e puipuia ai le Pasefika ma se Ripoti i le Tuuga o otaota niukilia Runit Dome
Laumua i Uosigitone –Na talisapai e le Tamaitaikonekeresi ia Aumua Amata i le vaiaso nei le pasia e le Maota o le Pili e Faataga ai Galuega mo le Puipuiga o le Malō mo le Tausaga Faaletupe 2020. O lea pili autū faaletausaga e faataga ai gaioiga a le Ofisa Tutotonu a le Matagaluega o Puipuiga, si'i ai totogi mo vaega au, si'i ai penefiti a aiga militeri ua maliu se totino na tautua, ma faalautele ai aiaiga mo le puipuiga o le Pasefika. E tatau ai se ripoti ua matuā manaomia e uiga i le tulaga o loo i ai le Runit Dome poo le Tuuga o otaota niukilia o loo i le Atu Masela, lea e tuu ai otaota niukilia mai faataitaiga niukilia e 67 na faia i totonu o motu o le Atu Masela a o le i o'o i le 1958.
Saunoa Amata, "Na ou fiafia ua pasia e le Maota lea pili tāua o loo aofia ai le 3.1 pasene o le si'i i totogi a le militeri, ua onomea mo a tatou vaega au, ma penefiti faaopoopo mo aiga militeri ua maliu se totino na tautua. O lea pili ua faalautele ai faiga a le Iunaite Setete e puipuia ai le Pasefika i feutagaina ma uo ma paaga mai le itulagi atoa, ma e tatau ai ripoti ua manaomia i se taimi vave lava e tusa o le tulaga o le Tuuga o otaota niukilia i totonu o le Atu Masela. E tāua le tutū faatasi ma a tatou uo i totonu o le Atu Masela ia mautinoa ai lo latou saogalemu ma maloloina mai le i ai o le Tuuga o otaota niukilia."
Faaauau le saunoaga a le Tamaitaikonekeresi ia Amata , "O faaiuga e aafia ai le puipuiga ma vetereni e telē le aafiaga i totonu o Amerika Samoa, lea e maualuga le aofai o o tatou tagata tautua i le militeri, ua lagona ai lo'u faagaeetia ua mautū le si'i o totogi mo vaega au mo le 2020. O le a faamautū e le pili nei le taula'i i le atuvasa atoa o le Indo-Pacific, ma faailoa tonu ai e ala i le igoa faiā tāua ma o tatou motu o malō tuaoi e tele."
Tamaitaikonekeresi ia Amata ma le Peresetene o Malō o Motu o le Atu Masela ia Hilda Heine.
O loo i ai le tulaga patino e tatau ai i le Failautusi a le Enetia a le Iunaite Setete ona tuuina atu se ripoti e uiga i le tulaga o le Tuuga o otaota niukilia o loo i totonu o motu o le Atu Masela. Ua faalautele ai foi penefiti i aiga militeri ua maliu se totino na tautua e ala i le aveesea o se tupe sa totogi e ta'ua o le ‘widow's tax' poo lafoga a se tasi ua maliu lona toalua. Na avea ma faamuamua a itufaaupufai e lua le aveesega o lea tapulaa i penefiti a aiga militeri ua maliu se totino na tautua. O loo faasolo auiliili foi i le lea pili matafaioi a le Iunaite Setete i totonu o le Pasefika, ma faalautele ai le Fuafuaga e Puipuia ai gaioiga i vaega o le Sami Initia ma le Vasa Pasefika, e maua ai a'oa'oga ma fesoasoani i motu o malō uma o le Pasefika.
Tamaitaikonekeresi ia Amata ma le susuga i le Admiral ia Phil Davidson, Ta'ita'iau a le Iunaite Setete i le Indo-Pacific Command lea e toatele tagata Amerika Samoa o loo tautua ai, i se Sauniga Aloaia mo tino maliu o fitafita ua toe auina atu mai Kolea.
I se vaaiga faalaua'itele i lea pili e mo faatinoga uma a le Matagaluega o Puipuiga, e aofia ai le fausia o le militeri, faatulagaga o aupega, meafaigaluega ma a'oa'oga, faatasi ai ma porokalama e leo ai le malō i totonu o le Matagaluega a le Enetia. Na pasia talu ai lea pili e le Maota ma le Senate, ma o le pili faai'u lea o se maliliega na soalaupule ai le Maota ma le Senate.
###