Talisapai e Amata le Tupe e $300,000 mo le Taumafaiga a le Kolisi Tuufaatasi ‘Aeae lea manu ua ulu’

Laumua i Uosigitone – Aso Lulu, Ua talisapai e le Tamaitaikonekeresi ia Aumua Amata le maua o se tupe mo le Kolisi Tuufaatasi a Amerika Samoa mo le Taumafaiga a Amerika Samoa O Avanoa Uma e Mafai Ai, o se faatatau i tausiga faifaipea, tulaga i tautua ma le maua o avanoa a o feagai ma le COVID-19. O lea tupe e $300,000 e mai le Pulega o le Soifuaga i A'ai o Tagata(faapuupuu i le faaperetania o le ACL) a le Matagaluega o Tautua mo Tagata ma le Soifuamaloloina (faapuupuu i le faaperetania o le HHS).

Saunoa Aumua Amata "E faafetai atu ia Tafaimamao Tua Tupuola, le o loo fai ma faatonu a le Iunivesite Autu mo le Lelei i Soifua o le Mamalu e i ai Manaoga Faapitoa a le Kolisi Tuufaatasi o Amerika Samoa i lona sao i le nei taumafaiga. E faamalo atu i le Kolisi Tuufaatasi a Amerika Samoa i le nei faailoga tupe, faapea i latou uma o le a aofia i le nei porokalama e fai ma sui o o tatou tagata. O lea taumafaiga matagofie o le a iloa ai faaiuga fai mo le soifuamaloloina ma aiaiga mo nai o tatou motu."

O lea taumafaiga a Amerika Samoa O Avanoa Uma e Mafai Ai(faapuupuu i le faaperetania o le NWD) (https://nwd.acl.gov) ua faamoemoe e aofia uma ai le teritori i se faatatau i le tali atu i le COVID-19, tausiga o le va fesootai, ma le fetuunaiga o le tausiga.

O lea seleni tuu faitalia e fesootai ma le porokalama a le Ofisa Autu o Alamanuia mo Tagata Matutua ma le Mamalu e i ai Manaoga Faapitoa(https://acl.gov/programs/aging-and-disability-networks/aging-and-disability-resource-centers) a le ACL.

Faaiu le saunoaga a Amata "E faafetai atu i le Failautusi o le HHS ia Alex Azar, ma le Pule o le ACL ma le Sui Failautusi mo Tagata Matutua le susuga ia Lance Robertson mo le nei fesoasoani mai le feterale."

###