Tautino e Amata i TagataMatutua o Siaki e $1,200 mai le Tulafono CARES e Aofia i Latou o loo Tali Saogalemu

Luamua i Uosigitone, - Aso Tofi, Ua talia e le Tamaitaikonekeresi ia Aumua Amata faapupulaga manino mai le Peresetene o Trump e uiga i siaki fesoasoani mo le coronavirus e $1,200 mai le Tulafono CARES e aofia ai tagata matutua o loo tali Saogalemu ma e le o toe faigaluega.

Saunoa Aumua Amata, "O le itu taua le i ai o le numera Saogalemu. O tagata matutua e i ai numera Saogalemu e agavaa, vagana o a latou tupe maua e sili atu i le aofai ua faatapulaa. O le tala fiafia o le tele o tagata e le tau faia fua se gaoioiga. O le a auina atu e le malo le siaki e fua i a latou lafoga toe maua talu ai ma tuatusi faamauina.

Faaauau le saunoaga a le Tamaitaikonekeresi ia Amata, "Ou te fia faafetai atu i le Peresetene ia Trump mo le nei faaiuga aoga e maua sa'o ai foi siaki fesoasoani mo a tatou tagata matutua e tali Saogalemu. O le agaga o le Konekeresi i nei seleni ina ia avea ma fesoasoani moni i tagata toatele e mafai ona oo ai i taimi o loo manaomia ai, o se faaiuga sa'o lea faalemalo ua finagalo autasi ai itufaaupufai e lua i le Tulafono CARES, ma na faia le faaiuga e aunoa ma se faatuai."

###