Tusi Amata ma Itufaaupufai e Lua i le SBA Auā Vaega Nonōtupe Laiti

Laumua i Uosigitone – Aso Tofi, Na au faatasi le Tamaitaikonekeresi ia Aumua Amata ma le Faipule ia TJ Cox (Temokalasi-Kalefonia), le na ta'ita'i i le taumafaiga, ma le Ao o le Maota le Faipule ia Don Young (Ripapilikana-Alaska) i se tusi e aga i le Pule o le Pulega mo Pisinisi Laiti poo le SBA(Small Business Administration) ia Jovita Carranza e uunaia ai le Pulega ia faaauau faaleleiga i le Porokalama e Puipui ai Totogi o loo aofia atoa ai pisinisi laiti, a'ai tu mamao ma a latou falenonō tupe. Fiafia foi le Tamaitaikonekeresi i le vaaia o le aga'i i luma, e pei ona faamaonia e le SBA i le Aso Lulu se isi vaega nonōtupe i totonu o Amerika Samoa, le Faletupe o le Teritori a Amerika Samoa, ma le amataga o le vaiaso na aofia ai i le vaega lua o nonōga tupe talosaga e 61 ua faamanuiaina.

O le Porokalama e Puipui ai Totogi ma le Tulafono e Faalelei ai Tausiga Faasoifuamaloloina – lea na pasia e le Konekeresi i le masina ua te'a – e aofia ai le $60 piliona o seleni mo le Porokalama e Puipui ai Totogi ua tuu ese mo Faletupe e Atinae ai A'ai poo le CDFI , faletupe laiti ma faletupe feololo ma iuni nonōtupe. O loo aofia ai foi le $50 piliona mo le Porokalama Nonōtupe a le Pulega o Pisinisi Laiti i le Afaina o le Tamaoaiga i Mala, o le a fesoasoani ai i pisinisi laiti ua sili ona afaina ia maua nonōga tupe latou te manaomia ia sao ai mai le nei puapuagatia. Peitai, e tele faletupe laiti o loo faigata ona latou faaaoga le porokalama e puipui ai totogi, ae maise lava i latou e motu ese o latou tulaga. Ina ia fesoasoani ia te i latou, ua talosaga sui i le SBA ia ui laasaga ma'oti nei:

• Faatulaga taiala manino ma toto'a mo avanoa i porokalama nonōtupe a le SBA, ae maise vaega nonōtupe e le o i lalo o le SBA o loo taumafai e iloilo nonōgatupe
• Ia tau o le 25% e atofa o seleni o le Porokalama e Puipui ai Totogi mo faalapotopotoga e pei o faletupe a atunuu (community banks), iuni nonōtupe (credit unions), ma Faletupe e Atinae ai A'ai poo CDFI (Community Development Financial Institution) e $50 piliona le fua o aseta pe i lalo ifo
• Tatalaina atu faamaumauga na aoina mai le vaega muamua o talosaga mo le Porokalama e Puipui ai Totogi i le Konekeresi ia ono faasoa lelei ai e Sui o le Konekeresi seleni i aofaiga talafeagai

Saunoa le Tamaitaikonekeresi ia Aumua Amata o loo fai ma Sui Ao Faailogaina o le Komiti a Pisinisi Laiti "Ou te fai ma sui o se Itumalo e feagai ma faigata i le mamao, tapulaa alamanuia, tapulaa tekonolosi ma falenonōtupe avanoa. E tatau i le SBA ona faamautinoa o nei pisinisi laiti moni nei latou te maua avanoa uma e mafai ia maua ai lea lavea'i. Ou te faafetai i le taumafaiga maoa'e e faatu ai se porokalama fou, ma le solo lelei o le SBA i le taamilosaga lua o nonōgatupe. Faafetai atu i le Aliikonekeresi ia Cox mo lana ta'ita'iga i le nei mataupu tāua."

"Ina ua mae'a ona avanoa mai seleni tuufaatasi mo le Porokalama e Puipui ai Totogi, na taalise le aveina e pisinisi tetele pei o faleaiga e faatau ai fasipovi (steak) se vaega aupito tele o nei nonōgatupe. E le talafeagai lea tulaga ma e talu mai lea aso na ou faalogo ua vaoia pisinisi laiti mai le Central Valley i le porokalama. O le faasoaga lona lua na atofa ai tupe i faletupe laiti ma faletupe feololo ae le lava lea e faasao ai a tatou pisinisi mo faatauga" o le saunoaga lea a le Faipule ia TJ Cox. "O le mafuaaga lea ua matou valaau ai i le SBA ia mautinoa e o'o nei seleni i pisinisi e sili ona manaomia i nei taimi o le puapuagatia. O pisinisi laiti o le ivitu lea o a'ai o Amerika, ma e manaomia ona tatou galue ma le filigā ma i se ala e au faatasi ai itufaaupufai ia faamuamua ai i latou ma puipui le soifuamaloloina o si o tatou atunuu, ma faasao le lelei o le tamaoiga."

"O le Porokalama e Puipui ai Totogi o se alamanuia e sili ona tāua mo le puipuiga o le lelei o lo tatou tamaoaiga, ae tatau ona tatou faamautinoa e le o faaaogaina e faletupe tetele se vaega le fuatutusa o seleni ua avanoa", o le saunoa mai lea a le Aliikonekeresi ia Don Young. "O pisinisi laiti o pou tu ia i totonu o a tatou a'ai, e le gata i totonu o Alaska faapea le atunuu atoa; e sili ona manaomia e i latou le avanoa i le porokalama lea. Ou te mitamita i lo'u au faatasi ma o'u soatau i lea taumafaiga tāua e faamautinoa ai o loo faia e le Pulega a Pisinisi Laiti mea uma i lona malosi ia atagia ai le ute o lona faamoemoe e pei ona faaigoaina ai ma ia faamuamua ai pisinisi laiti."

I totonu o le tusi, ua tusia ai e Sui: "Ina ia mautinoa le maua uma e a'ai ma itu uma o le atunuu le avanoa i le Porokalama e Puipui ai Totogi, e le tatau i a tatou ona faataga le tulaga lea toe itiiti lava na o faletupe tetele e faaaogaina nei seleni. Talu ai o le tele o taimi e le tautuaina e ia faletupe aupito tetele a'ai laiti maotua o Amerika, o se aiaiga le tonu e telē ai le maumau le faataga o nei falenonōtupe ona ave uma se vaega le fuatutusa o le tupe. E tatau ona talafeagai ma o gatasi le faasoaina o tupe e mautinoa ai le malosi o le toe tula'i mai e aunoa ma se a'ai e tuulafoaina."

Faitau le tusi atoa i nei here.

###